DOWNLOAD OUR APP

Read latest news on your phone
app-store

League sang ber mahni rama khel ve lo mi 3

Jun 20, 2022

Football hi khawvel puma ram hrang hrangte game khelh nasat ber a ni a, ram tin deuh thaw-ah khelin hnam chin dan phung leh vun rawng pawhin a thliar ve theih loh a ni. Chhungkaw rethei tak atanga seilian tam tak millionaire-a siamtu a ni bawk. Ram tinin league lian tak tak an nei chuti chung tuna kan player rawn ziah lan tur te hi chuan an ram league sang berah an khel ve miah lo thung. 

Football hi khawvel puma ram hrang hrangte game khelh nasat ber a ni a, ram tin deuh thaw-ah khelin hnam chin dan phung leh vun rawng pawhin a thliar ve theih loh a ni. Chhungkaw rethei tak atanga seilian tam tak millionaire-a siamtu a ni bawk. Ram tinin league lian tak tak an nei chuti chung tuna kan player rawn ziah lan tur te hi chuan an ram league sang berah an khel ve miah lo thung. 

3. Antoine Griezmann
 A naupan deuh laiin French club tam takin an hnawl hnu Antoine Griezmann hi France-in 2018 FIFA World Cup an chawi theihna tura thawh hlawk ber pakhat a ni. Griezmann hian a naupan laiin an ram a football academy hrang hrangah luh tumin trail a nei thin a, mahse a pumraw tet vang leh a chak tawk loh chhuanlamin hnawl zel a ni. 

Kum 2005 khan French naupang hian vanneihna a tawng hlauh mai a, Montpellier tana a trail tumin PSG youth academy nen an inhmachhawn a, he inkhel lo entu Real Sociedad scout chuan lo hmu fuh hlauhin a hnu lam zawng chu history-ah a chang zo ta nih hi.

Griezmann hi kum 9 chhung zet Sociedad lamah hian a awm a, 2014-a Atletico Madrid a pan hma zawng kha chu Real Sociedad lam tan player tangkai ber pakhat a ni chho char char, Wanda Metropolitano tan ropui taka a khelh hnu hian world class player zinga chhiar tel a ni chho ta reng a ni.

2019 khan hnawk deuh nuaiin Barcelona lamah a lut a, football hian a chungah zahngaihna thla a zar lo tih hial tur a ni. 2021-22 season khan Atletico Madrid lamah loan hmangin a chhuak leh nghal a, season duhawm tak a hmang thei lo. Mahse, Los Colchoneros tan hian season dang pawh a khel leh dawn a ni.

2. Gareth Bale

Gareth Bale-a'n Real Madrid a zawm hma khan, a zawnin kum 11 zet Real hian UEFA Champions League an chawi tawh lo. Hei mai nilovin a ram Wales hian Bale a neih hma hian kum 58 chhung zet Euro an khel tawh lova, World Cup lamah phei chuan kum 64 zet an hmel hmuh tur a awm tawh lo. Chung zawng zawng rawn titawptu chu Gareth Bale hi a ni. 

Bale hian Southampton youth academy belin left-back atangin bul a tana, 2007 khan Tottenham Hotspur a zawm a, he club atang hian football star tih zinga chhiar tel turin hming a rawn chher tan. Premier League-ah Spurs tana ropui taka a chetna chu Real Madrid lamin an hmuhhmaih lo, an duhzawng hmaih ngailo Real chuan kum 2013 khan Welsh mihrang hi khawvel player manto ber turin an lei chhuak. Los Blancos tan game 258 a inlan atangin goal 106 a thun a, assist 67 a nei bawk. 

Kum 32 mi winger hian Madrid-ah major trophy 16 a chawi tawh a, chung zingah chuan UEFA Champions League title panga a tel. A kum a upa hle tawh chungin kumin World Cup khel turin a ram Wales a tlingpui bawk.

1. Lionel Messi
Argentina lam chhuak sportsperson zinga ropui ber pakhat Lionel Messi pawh hian an ram top-flight league a khel miah lo. Messi hian kum 6 a nihin an khawtual club Newell's Old Boys zawmin a khel ve a, amah lah taksa lian lo chi alo ni bawk nen a thiam enin a langsar hma hle a, hun reilote chhungin talent ropui tak a nei tih an hre thuai. Kum 10 a nihin a hormone lamah natna danglam tak than theih lohna a awm tih hmuhchhuah a ni a, chu chuan professional footballer ni tura a zinkawngah harsatna a thlen thei tih an hria.

A khelhna club, Newell's Old Boys chuan a natna enkawl turin sum sen an tum bawk si lo, Messi-a chhungte mangang taka an awm laiin 2001-ah Barcelona an rawn lang nawlh, Messi chuan napkin-ah contract ziakin Rosario atangin Catalonia lamah a mutbu a pu chhuak a, a hnu lam chu kan hriat vek kha. 

Messi chu club ropui Barcelona tana player ropui ber a rawn ni chho ta a, Catalan tan hian goal 672 a thun bakah major title 35 zet a chawipui ve tawh. Mimal chawimawina hlu Ballon d'Or pawh tum 7 zet la tawhin kum 2021 khan, sum lama tlachhia a hmangaih Barcelona chhuahsanin Paris Saint-Germain a zawm ta ringawt.  

Argentina national football team tan Messi hian goal a khung tam ber a, 2021 khan a captainna hnuaiah Copa America an chawi bawk. 

Share now