Aizawl October 12, 2022 : MPYCC President Dr. Lalamalsawma Nghaka chuan, Healthcare bill bat rei lutuk chungchangah MPYCC in Ukil te hmangin sawrkarah Legal representation kan thehlut tawh a, a tul ang zelin Mizoram mipuite thlavang hauh nan High Court-ah kal zel an tum tih vawiin khan press statement a tihchhuak. 

Dr. Lalmalsawma chuan, MPYCC hian Mizoram sawrkarin mipuite Healthcare bill a bat sak rei lutuk hi kan ngai pawimawh a, Healthcare bill hrek anih avangin chhungkaw sing tel ten harsatna an tawk chho mek tih kan hriat hian a pawi kan ti a. Mi tamtakin pawisa puk chawp tak meuhin Healthcare hmachhuanin Damdawiinah an inenkawl a, bill an lak theih tak si lovah chuan mangang a, an ro neih ang chhun te hralhin, an damlohna senso puk rulhnan a kawtawpa tan a ngai leh si a, hei hi MPYCC chuan a pawi a ti takzet a ni, a ti.

MPYCC President chuan, Chief Minister zahawm takin, kum 2020 kumtir Assembly Session-ah “A damlo apiangin damdawi Ina an rawn hman theih turin, In khat tan nuai hnih thlengin SEDP ah tunah hian kan dah vek tawh a ni,” tih chiang takin a sawi a.  Chutihlaiin, August ni 20,2022 a RTI kaltlanga zawhna chhanna atanga a landanin Healthcare Scheme hnuaiah pawisa dah a awm lo a, bill pek chhuah theih loh anihna chhan chu bill pekna tur mamawh zat sawrkara atanga dawn a ni lo tih a ni. He RTI chhanna vekah hian August ni 26, 2022 thleng hian bill tang zat 28,448 awmin, a belhkhawmin, Rs.77,97,69,971(Vaibelchhe sawmsarih pariat dawn) a ni. He RTI vekah hian October ni 1, 2020 hnu lamah hian bill pek chhuah mumal a awm meuh lo tih tarlan a ni bawk.

Sum harsatna chhuanlamin sawrkarin Healthcare bill a hren laiin an duhsak zawngte tan contract thawhsen loh an pe reng a. May ni 25, 2022 khan Congress Thalaiin Healthcare  Society tlawhin, thil awmzia an zawt fiah tawh a ni. "June ni 21, 2022 khan Chief Minister hnenah Healthcare bill pe chhuak tur leh an hren sakna chhan puang tura phutna Memorundum thehluh kantum tawh a, hemi tum hian Chief Minister-in min duh lo a ni," Congress thalai chuan an ti. July ni 22, 2022 vek khan Aizawl  Tennis Court kawtah Healthcare bill batsak chungchanga mipuite thlavang hauhna inkhawm kan huaihawt tawh bawk.

Hetianga  kawng hrang hranga lehkha thehluh, mipuite harsatna Media kaltlanga tarlan leh mipuite thlavang hauhna inkhawm huaihawt hial anih tawh hnuah pawh kan sawrkar hian hma a la tha duh lo a. Chuvangin, Congress Thalaite chuan mipuite tawrhna tawh mek hi en liam harsa kan ti a, dan hmanga sawrkar kar a tul pawhin theihtawp chhuaha hmalak zel kan tum a ni. Hemi bawhzui zelna tur hian Mizoram sawrkar hnenah Healthcare bill bat chingfel turin kan ukil te hmangin legal representation kan thehlut tawh a, vawiin ni thleng hian chhanna kan la hmu lo a ni. Sawrkar hian Healthcare bill tang avanga mipuite harsatna a chingfel vat a tum lo anih loh chuan Congress Thalaite hian a tul angin Court sang zawkah mipuiten an chanvo dik tak an hmuh theih nan kal zel a tum a ni. 

Kan sawrkar hrawn mek hian kawng hrang hrangin mipuite  min sawp nasa a, sawrfu theih zawng zawngah min sawrfu zo tawh a. Chuvang chuan huaisen taka mipuite thlavang hauh ngam hi an rawn pen chhuah a ngai a ni. Vawiinah pawh Congress thalaite mipuite thlavang hauhin kan rawn au chhuak a, a tul anih chuan Court sang zawkah PIL thehluh thlengin hma lak an tum a, mipuite pawh hemi kawnga  thlawp tlat tur hian an sawmin an ngen a ni.