ZALEN November 19, 2024 : Centre for Environment & Social Justice (CESJ) chuan Mizoram Ninth Legislative Assembly-a sawrkar-in a adopt, 'The Scheduled Tribes & Other Traditional Forest Dwellers (recognition of Forest Rights) Act 2006' a lam tawia FRA tih te, Sawhthing (sawrkar policy), Solar Power Plant Development (SPPD) leh Monoculture Mizoram te chu kalpui zel chi niin an hre lo.

CESJ te hian Mizoram Ninth Legislative Assembly-a sawrkar in a adopt te kalpui a nih chungchangah political party, CBO/NGO leh kohhran te sawipui an tum. Nimin khan MPCC party hruaitute an kawm a, Mizoram tana a that loh theihna lai an zir chianna leh ram leilung thlenga chan theihna awma an hriat bakah CESJ te dinna an hrilh. MPCC hruaituten an dawngsawng danah lawmthu an sawi.

CESJ chuan, "CM Lalduhawma’n November 13, 2024 khan Nagar Van Yojana (Urban Forest) hnuaia Entlang Community Reserve Serchhip hmuna a sawi angin, 'India ram hmarchhak state-ah Mizoram chu ramngaw nei tha lo ber kan ni a, ramngaw tha (very dense forest) chu 0.74% chauh kan nei a, Mizoram zau zawnga chhutin 56.68% chu rambûa (open forest) a ni.'

"Hetiang hi kan ram dinhmun a nih mek avangin heng kan sawite hi Mizoram-ah kalpui zêl chi niin kan hre lo a. Khawi ramah mah ramngaw thiatin solar park an bun ngai lo a. Tlang rama awih lutukah Sawhthing an ching ngai hek lo a, mithiamte chuan sawhthing hi 15-30 degree slope (tlangawih level) vela sangah ching turin an rawt a, Mizoram leilung 70% hi tlang chhengchhia a ni a, 35 degree slope aia tam maha awih a ni (the study on development and management of land and water resources for sustainable agriculture in mizoram-japan international cooperation agency (JICA) nippon koei co., ltd. kri international corp. id jr 15-007 republic of india state of mizoram, minor irrigation department)."

CESJ chuan, "Ram rorelna-in mahni ram leilung hloh duai duai theihna dan a Adopt nawn hi kan pawmzam thei lo. Ram lailia mi ten an state chhunga an chin duh loh, Oil Palm hmarchhak state te min chin tir an tum hi Meghalaya state chuan an hnawl fithla thak a. Mizoram mipui tam zawkin pawhin kan duh tawh lo tih a hriat a, pawisa siam nana min chin tir leh an tum a nih chuan a tawpkhawk thlengin kan dodal ang," an ti.

Political party te hmalakna chungchang sawiin CESJ chuan, "Finance Commission-in ramngaw nei chhia state chu fund thlenga a hrek thin avangin leh, kan political party ten hmasawnna khingbai (un-sustainable) hmanga mipui rilru tihah zawng leh ram chhiatna tur zawng policy an neih thin hlawhchham dan pawh kan zirchiang vek tawh a. Political party ten vote zawn nana zirchianna nei lova kan ram leilung chhiatna tur kan kalpui thin ang hi ram hmangaihna aia mahni hlawkna leh politics khelhna hmanrua mai niin kan hria a. Hetiang thil hi Mizoram a political party tin ten policy ah nei tawh lo se tih hi kan duh tak zet a ni," an ti bawk.