Aizawl; Zirtawpni kaltaa Tlawng lei chim chhan chu a kilhna engemaw zat misual ten an ruk vang nia thudawn a ni. Zirtawpni chawhnu dar 2 bawrvel khan Sihhmui atanga Lengpui panna Tlawngl ei chu Truck AS-24 C in a zawh laiin a chim a, chhiatna thlengah hian mihring thi leh hliamna lutuk an awm, motor driver Rajibul Haque Lasker (27) Sonai khua leh Handyman Premjit Sinha te chuan hliam an tuar a, ngaihtuahawm erawh an ni lo.Truck hi kawng siamtu SLT Infra Ltd. Company hman lai niin kawng siamna tur alkatra leh rora phur niin a laihawl vel a thlen in lei hian a zo lo niin a lang a. A hmuna kal ZALEN palai hrilh hriat an nih dan chuan he lei innghahna chhuat hi a hmawr tawn ve ve-ah leiah a in nghat thui lo hle a, feet hnih leh a chanve bawr vel chauh tanchhan a neih bakah a kilhna engemaw zat hi a kim tawh lo a. Kan palai chhuan lei in thil rit a dawl zawh tawk tur leh lirthei khalhtute tana hriattur tarna pawh hmuhtur a awm tawh lo thu a sawi bawk. Tun tum hi he lei dawh a chim vawihnihna a ni tawh bawk. Sihhmui atanga Lengpui panna Tlawng Lei tuna chim thlakna tur hian a bulah RCC in lei hi siam a ni a, he hnathawktu (Contractor) hi M/S Tantia Construction Ltd., Nataji Subhas Road, Kolkata, niin July ni 17, 2009 khan hna hi an tan a, July ni 17, 2011 a zawhfel tura tih a ni. Hnathawh hun bituk kum hnih chhungin contractor hian a zawh hman loh vangin kumin April ni 1 thleng khan hna thawh hun pek belh an ni a, mahse vawiin thlengin zawh a la nilo a ni. Lei hi siam that a nih hma chu Airport kal tur leh khawtlang pana kal tur te chu kawng hlui buichali lamah kal tur a ni ang.