Aizawl:December ni 2,2015 a Sihhmui bula Tlawng lei chim chhan chu a zawh tawk aia rit phur motor in a zawh fo vang a ni tih lei chim chhan chhuitu Aizawl DC Dr. Fanklin Laltinkhuma chuan a report ah a tarlang a. Lei dawh that dawh anih hnuah zawh man (toll fee) lak a rawt bawk. Nimin khan a pisa ah chanchinbumite kawmin Lengpui kawng, Sihhmui bula Tlawng lei chim chhan a chhuina report a sawifiah a. Aizawl DC chuan Tlawng lei (bailey bridge) chu ton 15.5 chin zawh theih tur anih laiin a aia rit phur motor in an zawh fo niin an sawi a, a chim laia zawhtu motor pawh hian ton 37.398 a ritin a zawh niin a sawi. Aizawl DC chuan lei dawhtu Engineer lam chuan thiamlohna tehchiam an neih loh bakah lei dawhna part pawimawh bo a awmlo nia sawiin load limit aia sang phur thintu driver te chuan lei chim chhanah mawh an phur a, mipui lam pawhin thuneitute an tanpui tha tawklo nia a hriat thu a sawi bawk. Inquiry report ah hian Aizawl DC chuan Tlawng lei chu dawh leh anih hunah darkar 24 chhung ven ni tawh se tih a rawt a, lei paltlang thin motor te hnenah lei zawh man (toll fee) lak a rawt bawk a. Mahse toll fee hi Maxi cab, Taxi, phalchin phur bus, Mamit district registration nei motor, Lengpui a motor nei, Airport a hnathawk, damlo leh mitthi phur, phal chin phur truck, nuai 1.5 aia to lo two wheeler te chu ngaihhnathiam nise tih a ni a. Chhiah (toll fee) lak tur hi lirthei a zirin Rs. 50, 40,30 leh Rs.20 ah te bithliah nise tih a ni bawk a. Heng sum tlingkhawmte hi Traffic Coordination Committee kutah lut se, Mizoram chhunga lei dawh nan leh a awmsa cheithat nan hman nise tiin a rawt bawk.Tlawng lei chimta bula concrete lei dawh hna thawh mek a muan chhan chu Aizawl lam hnaiha lei ban phunna hnuaiah lei kalral in puk a siam vang niin DC chuan a sawi bawk a, lei ban hi a rinawm leh rinawm loh mithiam ten an enfiah leh dawn niin a sawi bawk.