Aizawl: Lei tawlh vangin Darlawn Venghlun-ah In 5 chhuahsan tawh a niin in pakhat thiah a ni tawh. Darlawn Venghluna lei tawlh hi Zirtawpni dar 11:00 vela in tan a ni a, he thu buatsaih lai thleng hian 5ft velin a tla hniam tawh a ni. Lei tawlh huam chhunga awm chhungkaw panga chenna K.Lalzela, Lalhmasaa, Vanlalhluni, A.Lalrinmawiate awmna in chu ruahsan tawh niin Lalnunthara in, Krossnunpuia luah mek chu thiah a ni tawh bawk. Darlawn Venghlun VC te chuan vanduaina avanga inthiar chhuak inluah tur nei lote inluah tur an zawnsak a. An bungruate pawh Darlawn Venghlun Kohhran Hall-ah inluah tur an hmuh hma chu an dahsak dawn bawk a ni. He laia lei che hi Darlawn Venghlun VC Member, Henry Biakthansanga chuan, “Lei tawlhna lai vel hi lei thawlna lai a ni a,  lei chetna hmun hma hi Darlawn High School II thlang lawk atanga intan niin Agriculture Department Office kawng hian ala dang niin a hriat a. Ruah a sura lei a che leh a nih chuan he lai mual hi a min thei vek dinhmunah a dik mek a ni,” a ti.