ZALEN, September 12, 2025: Union Railway Minister Ashwini Vaishnaw chuan Inrinnia hawn tur, Bairabi leh Sairang inkar rel kawng sialnaah lei verh dan chi thar hmuhchhuah a nih thu sawiin naktip atangin bungraw phur rel a tlan nghal dawn tih a sawi.

Railway minister hian Prime Minister Narendra Modi-a’n Inrinnia Aizawla Lammual atanga rel kawng a hawn tur pualin Zirtawpni khan Sairang Railway Station a tlawh a, rela a chuan nghal bakah thuthar lakhawmtute a kawm.

Vaishnaw hian rel kawng siam chuan hun leh tha a heh a, Mizorama a luh theih nan hian lei verh dan chi thar pawh hmuhchhuah hial a nih thu a sawi. 

Rel kawng hawn a ni tur chu Mizoram tan mel lung pawimawh tak a nih thu leh Look East Policy tihhlawhtlinna a nih thu a sawi a. Mizoram tana hun pawimawh leh chhinchhiahtlak, India state dang nena intlawhpawhna, inkungkaihna tha siamtu a nih a beisei tih a sawi.

Rel kawng thar hawn turah hian naktip atangin bungrua phurh tan tur thu a sawi a. “Srinagar atanga rela Delhi-a apple an thawn angin Mizoram pawhin in thlai leh thei neih tha tak tak, dragon fruit leh state dang neih ve lohte in thawn chhuak thei tawh dawn a ni,” a ti.

Union minister hi Lengpui Airport-ah Chief Minister Lalduhoma leh minister pahnih bakah Lok Sabha MP Richard Vanlalhmangaiha, Rajya Sabha MP K.Vanlalvena leh IPR&PS Secretary Betsy Zothanpari Sailo ten an dawngsawng. 

Prime minister chuan Inrinni hian Sairang to Bairabi railway bakah Rajdhani Express Aizawl (Sairang) - Delhi (Anand Vihar Terminal) inkar, Aizawl (Sairang) - Guwahati Express leh Aizawl (Sairang) - Kolkata Express a vai liam dawn a ni.