Aizawl February 24, 2023: PC Party President Vanlalruata chuan vawiin khan Mizoram state budget chungchangah thuchhuah (Press staetment) a siam a, Chief Minister chu leiba engto lovah a puh a, leiba hi engto tham nia a ngaih thu a thuchhuah siamah hian a tarlang a ni.

Vanlalruata chuan, "Budget thar atâna sum ruahman cheng Vaibelchhe 14,209.15 zînga cheng Vbc. 2,723.32 hi pûk tûr a ni a. Neihin a tlin miau loh chuan puk loh theih ni hek lo, kan bat belh zel a. Mahse, Pu ber engto tham kan la ba lo a. Mi hrang hrangin engto thama ngaih leh ngaih loh ngaihdân siam theihnân kan thlirho ang."

"Budget sawi hian budget ruahman thar hi kan sawi ber thin a. Mahse, budget thar hi chu ruahmanna mai anih avangin a dik thei lo a. 
A chunga tarlan 2023-24 budget pawh khi ruahmanna, rinthu a ni a. Kum kallai 2022-23 budget pawh hi a tak a la hriat loh a, ennawn hnu (revised) chauh a la ni a. A tak hriat tawh chin chu 2021-22 leh a hmalam kha a ni. Chuvangin a tak chin atangin thlir a ngai a ni " a ti.

Ruata chuan ''Sorkar kum tawp, March 31 zela tun hnai kum 5 chhunga kan leiba neih dân hetiang hi a ni: 

2017-18-ah cheng vbc 7,300.30 
2018-19-ah cheng vbc 7,315.54 
2019-20-ah cheng vbc 8,678.26 
2020-21-ah cheng vbc 9,881.09
2021-22-ah cheng vbc 10,570.93

“Kan leiba hi kan budget nen a inzât thuak thuak a ni" tih sawiin Ruata chuan, "Kan leiba hi chi hnihah then phawk a ni a. A pakhat zawk chu pûk, hunbi neia rulh ngai, public debt an tih niin hetah hian financial institution hrang hrang atanga kan puk leh Central sorkar atanga puk a awm hrang leh a; a sei lutuk lohnân hlâwm khatin kan tarlang tawp rih ang. A pakhat zâwk chu pung nei leh nei loa sorkarin a pek lêt leh ngai hrang hrang niin liabilities on public account tih a ni a, hetah hian chi hrang hrang - sorkar hnathawk ho provident fund tlingkhawm te, pension fund te, civil deposit te, savings leh reserved fund etc. te a awm hrang leh a. Hei pawh hi a hlawmin kan tarlang ang a, heng hi erawh chu hunbi neia rulh ngai ni lovin sum awmdan leh a lalettu tûrin a dil dân mila pek chhuah ngai a ni," a ti. 

Leiba chungchang sawi belh in Ruata chuan, "Leiba te hi a pung pawh a inzat lo a. Kum 2021-22 kum tawpa a pung rate chawhrual chu 10.15% a ni a. A peih tân a pung zât tûr awm ang chhût chhuah a har lo. Kan tarlan tâk angin kan leiba hi then sawm chuan hetiang hi a dinhmun a ni tih a sawi

A chunga tarlan kan leiba te khi a inthen dan ka sawi anga then sawm chuan hetiang hi a dinhmun a ni- 

1. Puk (public debt): 

2017-18-ah cheng vbc 3,334.28 
2018-19-ah cheng vbc 3,224.27 
2019-20-ah cheng vbc 4,018.03 
2020-21-ah cheng vbc 5,011.45
2021-22-ah cheng vbc 5,636.93

2. Pek let ngai (public account liabilities): 

2017-18-ah cheng vbc 3,966.02 
2018-19-ah cheng vbc 4,091.27 
2019-20-ah cheng vbc 4,660.23 
2020-21-ah, cheng vbc 4,869.64
2021-22-ah cheng vbc 4,934.00

Heng bâ hi, sawi tawh angin, a pung rulh reng a ni a. A pung rulhna atan hian 2020-21 khan cheng vbc 400.98 hman niin 2021-22 khan cheng vbc 450.64 hman a ni a; budget tharah hian cheng vbc 662.23 hman tura ruahman a ni. Nakumah cheng vbc 715.21 hman ngai tura ngaih a ni.

Kan leiba (a capital) te hi a hmin (mature) hunah rulh a ngai bawk dâwn a. Hemi nêna chhiar tel hian 2020-21 khan ba rulhna atana kan hman zawng zawng chu cheng vbc 3,760.96 a ni a. Hemi hma kuma kan hman chu cheng vbc 2,914.45 a ni. 2020-21-a kan leiba zinga cheng vbc 1,945.08 hi hemi kum atanga chhiar kum 5 ral hmaa rulh zawh vek ngai a ni a. A pumpui hian kum 7 ral hmaa rulh zawh vek ngai a ni.
Kan sum dinhmun a that loh a, inrelbawlna senso pawh kan indaih mang loh avangin leiba rulhna tur hi puk a ngai hial tawh a. Hei hi leiba thang (debt trap)-ah kan tang kan tih thin chhan hi a ni 

Tuna kan kal dân atanga chhût thuak hian kum 5 lo kal leh turah khi chuan ba rulhna atan hian cheng vbc 10,000 vel kum khatah kan mamawh tawh dâwn in a lang a.

Heta kan leiba tarlan bakah hian kan sawrkar ni chiah lo, midang tia sawi mai turin loan an lâk, an rulh theih loh palha kan sawrkarin a rulh ngai tur hi cheng vbc 100 chuang a awm bawk," a ti.

PC Party President Vanlalruata chuan, “Engto thamah kan ngai êm le? “ tiin mipuite a zawt a ni.