ZALEN, Sept 4, 2025: Bungraw phurh hautak ti zia tur leh zin vei vah ti awlsamtu tura beisei, Sairang rel station chu vawiin khan Mizoram Journalists' Association leh phai media te'n tlawhin, Sairang-Bairabi-Sairang rel kawng thar chu relin an zawh nghal.

Northeast Frontier Railway (NFR) Chief PRO Kapinjal Kishore Sharma chuan ZALEN hrilhin Rajdhani Express chu Sairang station thleng tlan tir tumin ruahmanna a awm mek a ti a. "Tuna ruahmanna en chuan a hlawhtlin hi beisei awm lam zawk a ni," tiin ZALEN a hrilh a ni.

NFR Chief PRO chuan, "India khawmualpui leh Mizoram state thlunzawmtu Sairang-Bairabi rel kawng vang hian bungraw phurh luh man a tlawm dawn a, hei hian market a tha zawngin a nghawng dawn a. Local tourism a ti thang anga, entrepreneur te tan kawng a hawng dawn a, hna tam tak a siam beisei a ni," tiin a sawi a.

"By-road zin pawh a bikin dam lo tan a hahdam phahin hun khawhral a tlem phah dawn a. Darkar 12 chhungin Guwahati a thlen theih dawn a, Silchar pawh darkar 3 ah a thlen hman ang," tiin ZALEN a hrilh bawk.

NFR thupuangtu sawi zel danin Bairabi-Sairang rel kawng senso hi Rs vaibelchhe 5,521 a ni phawt a, revise hnuah Rs vaibelchhe 8,000 chuang hretah a chho ta thung a ni.

Bairabi-Sairang New Line Project rel kawng hi km 51.38 a thui niin station 5 - Bairabi, Hortoki, Kawnpui, Mualkhang leh Sairang te a awm a. Sairang rel station hi 6,372 sq.m a zau a ni a, chhawng thum a ni.

 Leiverh (tunnel) 48 awmin, leiverh thui ber chu 1.37 kms a ni a. Leiverh 48 thui zawng belhkhawm chu km 12.85 a tling a. "Leiverh te hi lirnghing lakah pawh him tura design leh sak an ni a. Rel kawng thar hi km 51 a ni a 25% chu leiverh a ni," tiin NRF lam chuan an sawi bawk.

Lei (bridge) 142 a awm a, sang ber chu No 144 Kurung Ruam a lei dawh niin India rama pier bridge dawhah a sang ber a, metre 114 laia sang niin Qutub Minar aiin metre 42 in a sang a ni. 

Tualchhung media mite hian 10:00 AM khan Sairang rail station an chhuahsan a, rel hnathawkte'n hmun chhinchhiah lai ngai nia an ngaihahte dinpuiin zawhna leh chhanna hun an hmang a, Bairabi ah chaw an fak a ni. 

Bairabi-Sairang inkar hi chawl lo chuan darkar khat leh minute 25 vel tlan a ni.

Bairabi–Sairang New Railway Line Project hi November 29, 2014, khan Prime Minister Narendra Modi chuan lungphum a lo phum tawh a. September ni 13, 2025 hian Lammual atangin a hawng dawn nia thudawn a ni bawk.

May 2025 khan CM Lalduhoma chuan Railway Minister Ashwini Vaihnaw hnenah Sairang atanga New Delhi thleng Rajdhani Express tlan tir tur leh Sairang- Howrah Railway service tir a lo ngen tawh bawk.

Station inhlat dan:

Bairabi to Hortoki - 16.72 kms

Hortoki to Kawnpui - 9.71 kms

Kawnpui to Mualkhang - 12.11 kms

Mualkhang to Sairang -12.84 kms