India-a chhanchhuah hna thawktute chuan ni riat liam taa leiverhin a chim hnana tang mi 41-te lak chhuah tumin an beih chhunzawm zel.

Ruahmanna hmasaa a hnawhtu lei tlate verh tlanga thir pipe rawlh luh tum chu harsatna a awm avangin chawlhsan a ni a, rescue team hian Zirtawpni zan khan lei khi thawm an hriat avangin he hna hi an chhunzawm ta rih lo.

Thuneitute chuan ruahmanna thar neiin tlang chhip lam atangin hmun hnihah a ngila verha thawktu tang mekte ‘vah chhuah theihna’ siamsak an tum lek mek.

Uttarakhand-a leiverh siam lai mek hi lei min nasa takin a hnawh mek a ni.

November 12-a hmar lam state, Uttarkashi district-a chhiatna a thlen hnuah mi tangte biakpawh theih an ni a, oxygen, ei tur leh tui pek an ni bawk.

Uttarakhand Disaster Management Secretary Ranjit Sinha chuan ruahmanna thar an kalpui mek chungchang hi news agency ANI hnenah sawiin, a leiverh pui ber atanga an chhuah theih nan chhuahna tur leiverh dang an siam dawn tih a sawi.

Thawktute hian leiverh luhka atangin an verh a. Hmun dang atangin verh a ni bawk.

Union Highways & Roads Minister Nitin Gadkari chuan Pathianni khan a tlawh a, chhanchhuah hna thawh chu ‘ni hnih thum’ a la ngai dawn tih a sawi.

Himalaya tlangdung hmun khawkrawka hna thawh chu a khirh hle tih a sawi a, drilling machine pahnih hmanga thawh mek a nih thu a sawi.

Khawl pakhat zawk hian lei tlate verh tlang tumin a bei a, a lei a nem avangin a verh tluan viau laiin lung a tawng fuh ta niin a sawi a. He harsatna tawh hi mi thiamten an ching fel thei dawn niin a sawi bawk.

Thuneitute chuan leiverh luhka lam a\ang hian engtikah nge an verh tan leh theih dawn an sawi thei lo va; mahse, thawktute chuan khawl thar nen an thawk tan thei mai dawn niin an sawi.

Mi tangte hi inches ruka zau pipe hmangin ei tur pek an ni a. Thei ro, chaw chhum leh be lam pawh pek an ni.

Thawktu tang mekte nena inbe reng medical officer chuan an zinga pathum chuan santen an vei a, damdawi thawn luh a nih thu a sawi.

Inrinni khan tang mek chhungte leh chhanchhuah tuma beitute inkarah intihthinrimna a thleng a. Kar hmasa tir lamah khan an chhungte hian thuneituten an verh muang lutuk chu an lungawi loh thu an lo sawi tawh bawk.

Hetih lai hian Prime Minister Narendra Modi chuan an chhungte hnenah ‘sorkar laipui leh state hnuaia chhanchhuah hna thawktute chuan chawi lovin an bei’ niin a sawi a. “Tang mekte rilru hi tihhnual tur a ni lo,” a ti.

Chhanchhuah hna thawh mek zelah hian tlang chhip atanga leiverh siamna tur pawh buaipui mek zel a ni a. Indian railway thuneituten hei hi buaipuiin a chhengchhiat em avangin thawh sawt a harsa niin an sawi.

Silkyara tunnel hi sorkar laipuiin Uttarakhand-a sakhaw hmun pawimawhte tlawhpawh a awlsam zawkna tura a siam a ni.

Tlangram state hi Himalaya tlangdunga awm niin tlang chhim leh vur ramah pawh Hindu zuitute hmun thianghlim tak tak a awm a ni.