Aizawl: Tun lai hian New Secretariat Complex leh Dinthar inrina Tuikual luiah leivung nasa taka paih thin a nih avangin Tuikual lui hi a in khuah mek bakah helai kawnga lirthei kal ten harsatna an tawk niin Zalen chuan thu a dawng. New Secretariat Complex khawtlang hruaitute hnen atanga thudawn danin an veng leh Dinthar inrina lei thlang Tuikual luia leivung paih mek tu te chu High Court building thar tur sa mektu NECS hnathawktute an nih thu an sawi a. Tuikual lui-a leivung paih hi GAD hnuaia Secretariat Management Committee-in an phalsak niin an sawi bawk a ni. Leivung hi New Secretariat Complex atanga Dinthar leh Chawnpui veng lam panna kawngpui Tuikual lui chungzawl atangin, Tuikual luiah hian paih thin a ni a. An leivung paih hi motor kawngah engemawzat a tan thin avangin, helai kawnga hi ruahtui tlak laiin a diakin a nal thin hle a, khaw that laiin a khu leh hle thin bawk a. Kawng a nal avang hian lirthei ke hnih nei tan phei chuan tlan a harsa hle thin niin an sawi bawk. He leivung tam tak paih hian Tuikual lui kuang chu chhilhin tui a in khuap tam hle tawh bawk a, tui in khuahna laiah hian bawlhhlawh leh thil tawp tak tak a in chhek khawl hnem hle tawh bawk a. He leivung paihna bulhnai leh Tuikual lui bula awm te chuan leivung paih in Tuikual lui a khuap chu tha an tih loh thu leh mihring hriselna atan pawha thalo thei a nih thu an sawiin, Tuikual lui hi humhalh ngai tak a nih tawh bawk avangin leivung hi paih tawh loh nise an ti hle tih an sawi bawk a ni.