Lelte Award 2023 chu Ningani (Dt. 16.11.2023) zan khan Dawrpui Multipurpose Centre-ah sem a ni a, Song of the Year atan famta Joseph Zaihmingthanga sak 'Minlo kai ang em' tih chu thlan a ni. Gospel huangah hian Maruati leh Zorema Khiangte ten Singer of the Year an la.

Lelte Award hi Gospel leh Lengzemah then a ni a, Gospel sem hmasak niin zaninah Lengzem huangah award sem ve leh a ni ang. Rinlawk ang ngeiin Zorema Khiangte a langsar a, Singer of the Year (Male) hlan a ni - hmeichhe lamah Maruati chuan Singer of the Year award hi a hum haw ve bawk. 

Mipui rilru hneh ber tih ngam chu Song of the Year a ni a, famta Joseph Zaihmingthang-a'n ama hla phuah ngei thiam taka a sak 'Minlo kai ang em' tih chu thlan a ni. Joseph-a award dawn hi a nu chuan a lak sak a, Joseph-a fa ten an tawiawm bawk a ni. 

Jonathan Lianhna music video 'Nun Tobul' chu Music Video of the Year atan thlan a ni a, New Artist of the Year chu C. Vanlalroluahtumi a ni. Duo/Group of the Year atan Seraphic Choir te thlan an ni a, Song Composer of the Year chawimawina chu Jonathan Lianhna hnenah hlan a ni - award pahnih la thei awm chhun niin mimala langsar ber a ni. 

Mizoram Synod Choir ten Choir of the Year award an la a, Pavalai Zaipawl of the Year atan Kanan Kohhran Pavalai Zaipawl te thlan an ni bawk. 

GOSPEL CATEGORY WINNER

* Singer of the Year (Male) - Zorema Khiangte

* Singer of the Year (Female) -Maruati

* Song of the Year - Minlo kai angem – Joseph Zaihmingthanga (Joseph Zaihmingthanga)

* Music Video of the Year -Nun Tobul – Jonathan Lianhna

* New Artist of the Year - C. Vanlalroluahtumi

* Duo/Group of the Year - Seraphic Choir

* Song Composer of the Year - Jonathan Lianhna

* Choir of the Year - Mizoram Synod Choir

* Pavalai Zaipawl of the Year - Kanan Kohhran Pavalai Zaipawl