American lemchan thiam Kirstie Alley chu cancer natna avangin a thi a, kum 71 mi a ni. 'Cheers' actress Kirstie Alley hi nimin December 5 khan a thi a, vawiin lam khan puanzar a ni chauh thung. 

A thih thu hi a fate chuan tarlangin, "Rilru hreawm tak chhunga kan hrilh duh che u chu hei hi a ni, kan nu duh tak chuan mual min lian san ta," tiin vanduaina an tawh thu an tarlang. Alley thih thu hian lemchan khawvel a dengchhuak nghal a, uitu pawh a ngah hle. 

Kirstie Alley hi comedy series 'Cheers' ah a inlan thin a, kum 1980 leh 90 chho kha chuan a lar thin hle. Chawimawina pawh a dawng hnem hle a, chung zingah chuan Emmy Award leh Golden Globe Award te pawh a tel. Kansas-born star hi film series 'Look Who's Talking' leh TV sitcom 'Veronica's Closet' ahte pawh a inlan a ni.