ZALEN April 14, 2026: MPCC Spokesperson & General Secretary Dr. Lallianchhunga chuan IAF te tana Lengpui Airport bul ram lâk a nih avanga cheng nuai 11,790 insemna awm anga lang hi Mizoram history a mipui pawisa eirukna (corruption) lian ber a ni, a ti.

Dr. Lallianchhunga chuan, "Compensation hmanga Indian Air Force (IAF) te tana Lengpui Airport bul ram lâk a nih dan chungchangah Dan bawhchhiatna nasa tak a awm avangin Congress party chuan he thil thleng hi a ngai thutak hle a. Press Conference leh Press Release hmang tein vawi engemaw zât thudik puangzar turin ZPM sawrkar a lo ngen tawh a ni. 

Mipui pawisa tam tham tak, nuai 11,790 chuang insemtu an awm ngei a ni tih hi Mizoram mipui rin dan a nih avangin Feb 5, 2026 khan CBI Aizawl Unit hnenah pawh hemi chungchang hi chhui ngei turin First Information Report (FIR) kan thehlut tawh bawk a. Heti khawpa kil hrang hrang aṭanga ZPM sawrkar kan nawr chung hian ZPM sawrkar hotute zingah a hlawkna têl vetu an awm nge, ZPM sawrkar chu insawifihlim tumin tan ala khawh char char a ni," a ti.

Congress Spokesperson chuan, "IAF te tana Lengpui Airport bul ram lak a nih avanga cheng nuai 11,790 insemna awm nia sawi hi Mizoram history a mipui pawisa eirukna (corruption) lian ber a ni a. Pu Zoramthanga pawh a unaute pawisa cheng nuai 909 a kawl chungchangah nasa taka beih a tawh laiin, cheng nuai 11,790 meuh insemna a awm ngei nia sawi awm chungchang hi Mizoram hmangaihtute tan en liam chi a ni lova. 

Cheng tam tak diklo taka insemna a awm ngei nia lang hi chhui chhuah a nih ngei theih nan leh a mawhphurtute dan anga hrem an nih ngei theih nan Congress party chuan theihtawp a chhuah zel dawn a. ZPM sawrkar pawhin sum tam tak insemtute hi chhui chhuah tir a tum tak tak lo a nih chuan dikna leh rinawmna hi ZPM sawrkarah beisei tur a awm lo tihna a ni ang," a ti bawk.