October 4, 2023; Mizoram Police chuan inthlanpui lo awm tur thlir chunga venhimna leh ruihhlo dona kawnga ngawrh lehzuala tan a lak mek laiin nimin, October 3, 2023 khan Lengpui Airport-ah Methamphetamine (Crystal Meth) tam tham tak man a ni. Meth hi Kg 10.4 niin, a hlut zawng hi international market rate-ah cheng vaibelchhe 31 chuang hu nia chhut a ni.

He ruihhlo (Meth) hi Myanmar atanga Delhi pana tawlh thlak mek niin, Lalremthangi (kum 38) mi thawmhnaw bawm (suitcase) atanga man a ni. Suitcase hi INDIGO Security X-Ray khawla scan a nih laiin rinhlelh a ni a, Mizoram Police ANTF (Anti-Narcotics Task Force) Unit ten ruihhlo hi belchiangin, man nghal a ni. A kengtunu pawh hi man nghal niin, ND&PS Act leh Foreigners Act hnuaiah Special Narcotics Police Station Case No.48/23 dt.03.10.2023 ziah luh a, thubuai siamsak nghal a ni.

Thu zawhfiahna atangin ruihhlo neitu hi Myanmar khua leh tui, Delhi-a Spa-a hnathawk a ni tih hriat a ni a. Tunhnaiah Myanmar hi tlawhin, ruihhlo tam tham tak nena Delhi lam a pan leh laia man a ni ta a ni.

He ruihhlo man hi tunhnaia tum khata ruihhlo man hlawhtling leh lian tham ber anga ngaih a ni a. He mi hma thla khat kalta vel khan hetiang ruihhlo (Meth) tho hi Kg 3 vel, international market rate-a cheng vaibelchhe 9 man hu vel nia chhut chu ANTF Aizawl te hian an lo man tawh bawk a ni.

Heng ruihhlo lian tham tak man chungchanga hnu chhui zui ngai te hi ANTF Unit te hian ngawrh takin an chhui zui mek a ni.