Aizawl; Chief minister Lalduhoma'n Indian Air force kuta Lengpui Airport hlan chungchangah thutlukna siam fel a la ni lo tih a sawia, oil man chungchangah rate an tihsan hman zui tur a nih thu a sawi.

Vawiin chawhma a a office a thuthar thehdarhtu thenkhatte a kawmna-ah chief minister chuan, Indian Air force kuta Lengpui Airport hlan chungchang-ah nimin (16.10.24) cabinet meeting in thutlukna a la siam fel lo tih sawiin, a zirchiangtu working committee in an zirchiang zel ang a, chu chu cabinet meeting-ah ngaihtuah leh a la nih tur thu a sawi.

Chief minister chuan oil man chungchang pawh sawiin, Council of Minister-in oil man tihniam loa, September ni 1, 2024 atanga rate tihsan anga hman zui tura thutlukna an siam thu a sawi. Cess lak te chu hmasawnna hnathawhna atan hman a ni dawn tih a sawi a, chumi tur atan chuan ruahmanna chi li (4) duan fel a ni tih a sawi, "A chhawrtu tur chu mipui kan ni," a ti.