ZALEN December 3, 2025: Thawhlehni zan khan Chief Minister leh PWD Minister hriatpuinain Lengpui Airport thlawhna tum kawng siamthat mek chu MLA pathum - Lalfamkima, Deputy Speaker; Er. H. Ginzalala, Adviser to CM (Technical) leh T. Lalhlimpuia, MLA ten an tlawh. Mizoram PWD Chief Engineer (Highways) Er. Robin Lalrinawma leh a thawhpui ten MLA te hi an lo dawng sawng a ni.

Hnathawh mekna hmunah hian MLA te leh PWD official ten an hnathawh lai an endik a. Lalfamkima chuan, mi tam tak nunna chan theihna hmun a nih avangin Airport Runway neih that a pawimawh thu sawiin, kan ram hmel hmang lanna pakhat a nih thu te, Runway a that loh chuan Mizo mipui zin vei vak bakah State pawn atanga khualzin ten harsatna an tawh thin thu a sawi a, an hnathawh dan enin mipui beisei ang ngeiin Airport Runway tha zawk kan nei tur chu hnathawktu leh a viltu Mizoram PWD chungah lawmthu a sawi.

Er. H. Ginzalala pawhin, "An hnathawh tawh leh thawh mekte kan enin a tha thawkhat hle a, Laboratory Testing Room thlengin kan luh chilh a, tun dinhmunah chuan sawiselna tur kan nei lo. Temperature te, a chhah zawng te, a chak zawng te, levellling te leh tehna dang te pawh a hmunah kan enpui vek a, hna an thawk tha rih hle a ni," a ti.

T. Lalhlimpuia chuan, 'Lengpui Airport pawimawhna hriaa Runway siam thatna tur ngaihtuahtu kan Chief Minister leh a thawhpuite an chhuanawm hlein ka hria, hei mai bakah hian zan khuaa hnathawktute leh a viltu PWD te an fakawm hle a ni," a ti bawk.

Lengpui Airport Thlawhna tum kawng siamthat mek hi SASCI 2025-2026 Part-I AA hnuaiah ‘Upgradation of Lengpui Airport (Upgradation of Runway to PCN 50)’ tih a ni a, hnathawh nan cheng vaibelchhe 91 dah a ni a. Hna hi Airport Runway recarpeting (siamthat) lama sulhnu nei tha tak Brahma Infratech, Rajasthan ten an thawk mek a, chhun lamah hna a thawh theih loh avangin zan khatah a tlangpuiin 2500-2800 Square Meters an thawk hman thin. Chhun lama Thlawhtheihna a tum leh theihna turin zingkarah PWD ten Quality test an nei ziah a, chu chu Air Traffic Controller (ATC) in a pawmpui leh vek a ngai a ni.

November 10, 2025 atang khan hna hi thawh tan a ni a, April 2026-ah thawh zawh tum a ni. Lengpui Airport Runway siamthat hnuhnung ber hi 36 PCN-in kum 2020 khan siam a lo ni tawh a, tunah hian 50 PCN chung lam ni turin siam mek a ni a, Thlawhtheihna lian zawk pawh tum thei tura beisei a ni. 

Tum danga Runway siamthat ang lovin, technology sang zawk, German company siam Milling Machine hmangin 150 mm thickness-in Runway pumpui hi Mill chhuah vek a ni dawn a, 170 mm-a chhahin a thara siam tur a ni.