ZALEN February 1, 2026: Lengpui khawtlangin an khaw ram chhungah force lam mi reng reng inbun an remti lo a. An ram chhung hmun thenkhat Indian Air Force (IAF) tena an lei nia lang chungchang pawh an theih ang angin an zirchiang bawk.

Lengpui khawtlang hruaitute hnen atanga ZALEN thudawn danin, Lengpui khawtlang joint committee chuan an khaw ram chhungah force lam mi reng reng inbuntir an remti lo a, chutiang a awm a nih chuan dodal zel an tum niin a sawi a. Hetihlai hian an dan theih loh chin erawh a awm thei niin thudawnna chuan a sawi.

Lengpui airport chhehvel IAF kut a hralh nia lang chungchang chu an khawtlang hriat loh a thil kal a nih avangin sawi thui theih an nei tam lo tih thudawnna chuan sawi bawkin, an hriat ve leh Lengpui khawtlang joint committee chuan an zirchian nghal thu leh sawrkar hotute pawh hemi chungchang hi nikum lam khan an lo zawh chian tawh thu a sawi bawk.

Hetihlai hian August 29, 2025 khan Lengpui Airport Forum hruaitute chuan Aizawl Press Club-ah thuthar thehdarhtute kawmin IAF-in Lengpui Airport bulah ram sq. ft. 50,09,400, Rs. Vbc. 198.78 man an lei thu an sawi.

Lengpui Airport Forum hruaitute sawi danin, IAF-in ram an lei hi mi pariat ram niin ram hi Lengpui Airport runway hmar lam atangin km. khat velah a ni.

Lengpui Airport Forum hruaitute chuan IAF hnena ram hralh chu tha an tih loh thu leh him lo a an hriat thu an sawi a, “Airport Authority of India (AAI) hnena hlan tura central sawrkar lam an inhawn em em laia bawhzui tha duh loa, mi mal ram IAF an leitir hi tha kan ti lo,” an ti bawk.