Mipui hlut hlawh LBS Suzuki All Mizoram Inter Village Football Tournament khelh mekah vawiin atang khan quarter-final khel tan niin Lengpui leh Champhai Kanan te an khingpui hnehin semi-final an lut.

Tun Inter Village-a champion tura rin kai phak Hnahthial Jt. VC team lmin inkhelh bul an tan fuh a, inkhelh pawh an thunun deuh zawkin a hriat. Minute 54-naah penalty atangin Joseph Vanlalhruaia hmangin goal an khung hmasa a, he goal khat hi hun pangai tawp dawn thleng Lengpui lam hian an phur. Mahse, India tana khel tawh Lalchhuanmawia Fanai te, Indian Super League lama khel mek Joe Zoherliana leh Mizoram striker tha zing ami Lalremsanga te awmna Lengpui hi an hnual mai lo. Hun tawp dawn tep added time-ah F. Lalremsanga chuan an goal phurh a sut a, hun a tawp zui. 

Lengpui leh Hnahthial hian extra time khelh zawmin an inhnehtawk hle a, hun rei an khelh mhain Hnahthial lam hian yard 50 vela hlaah free-kick an chawi a, a chhuih turin Lengpui captain Joe Zoherliana a rawn pen chhuak. A hlat em avangin Hnahthial lam pawh an hlauthawng teh chiam lo. Mahse Joe chuan mawi tak maiin free-kick atangin minute 93-naah an goal hnihna a rawn thun a, 2-1 a ni ta. Hnahthial lamin sut leh ngei tumin an nawr let a, bar te pawh han pet per bawk mahse an duh ber goal-ah erawh an thun thei lo. Tichuan, Lengpui VC team te chu semi-final in pek kai hmasa ber niin semi-final ah hian Republic Veng LC team hnehtu Champhai Kanan nen an inhmachhawn ang. 

Hnanthial Jt VC 1-2 Lengpui
Hnahthial Jt. VC: Joseph Vanlalhruaia 54'(P) 
Lengpui VC: F. Lalremsanga 90+1 (P); Joe Zoherliana 97

Quarter-final match hnihnaah hian Team hnuhnawm pahnih Republic Veng LC leh Champhai Kanan te an inhmachhawn ve thung a, chhum zing vangin hun rei vak lo inkhelh a khaihlak deuh naa tluang takn an khelh chhunzawm thei a, hun pangaiah inhnehtawkin penalty-ah Champhai Kanan an vannei zawk a, semi-final an lut. 

Inkhelh tan phat atangin inkhelh a tang nghal a, minute hnihna lekah Champhai striker Ramdinthara chuan penalty area-ah khalh lutin Republic defender-in alo titlu a, penalty a hlawhchhuak. Ama penalty hlawhchhuah chu chhuih nghalin minute thumna lehkah 1-0 in hma an hruai der. Minute 10-na lekah R. Ramdinthara bawk chuan a goal hnihna khungin Champhai lamin 2-0 in hma an hruai. 

Republic Veng LC team lamin tan hmun an siam rem tak tak hmain si hnih an phur der mai. Mahse, tlawm mai an tum lo. Minute 42-naah F. Lallawmkima chuan goal rawn thunin Republic fans tan beiseina a rawn siam sak. Goal lut lovin chawlh lawk an hmang a, minute 71 naah chuan Aron Vanlalrinchhana'n Republic tan bawk rawn ti goal ve lehin an siphurh a rawn sut zo. 

Inkhelh hmuhnawm takah hian goal luh belh lovin hun pangai a tawp a, extra time khelh a ni. Hun pek belhah pawh team pahnih ten goal thun belh lovin 2-2 extra time pawh chu a tawp leh. Penalty shootout hmanga chak zawk zawn niin Champhai Kanan lam atangin mi 4-in penalty an pet lut a, Champhai goalkeeper Zosanga a chetha hle a, Republic Veng player pathum lai penalty pet dan sakin 4-3 in a team a chakpui. 

Republic Veng 2-2 Champhai Kanan
Republic Veng: F. Lallawmkima 42'; Aron Vanlalrinchhana 71'
Champhai Kanan VC: R. Ramdinthara 5', 10'
(Penalty shootout-ah Champhai Kanan 4-3 in an chak)