Aizawl: Health Department chuan Lengpui airport leh Vairengte ah Mizoram a lo lut tur ten swine flu (H1N1 natna) an vei leh vei loh enfiah hna an thawk chhunzawm zel. Integrated Disease Surveilence Programme a nodal officer Dr. Pachuau Lalmalsawma hnen atanga Zalen thudawn danin Delhi atanga lokal swine flu vei an enkawl mek chuan thatlam a pan zel tih a sawi a. Swine flu vei thar nia rinhlelh sample an lak pawh vawiin hian a result hriat a beiseiawm tih a sawi bawk. Dr. Pachuau Lalmalsawma chuan swine flu enkawltute inthuamna tur 'personal protective equipment' pawh 200 chah thlen a ni tawh tih sawiin a damdawi Tami flu pawh vawiin Pathianni hian Aizawl a lo thlen an beisei tih a sawi. Mizoram tan chuan swine flu test na hnai ber chu Kolkata niin hna an ngah viau loh chuan sample thawn atanga ni 2 hnu velah result hi hriattheih thin a ni. Dr. Sawma chuan swine flu vaccine chu pakhat Rs.800 vel a ni tih sawiin mitin in vaccine lak an duh dawn avangin a thlawna pe tur chuan sawrkar tan a buaithlak dawn tih a sawi a. High risk te tan chauh an pe thei hrih nia sawiin vaccine hian 100% a ven leh ven loh hriat a la nilo niin Zalen a hrilh bawk.