ZALEN March 1, 2026: Chief Minister Lalduhoma’n Lengpui ram hralh chungchang chu Central Bureau of Investigation (CBI)-ah an refer fel tawh tih a sawi.

Assembly budget session neih mek, February 27, 2026, Zirtawpnia private member resolution sawihonaah he thu hi sawiin chief minister chuan, Lengpui ram hralh chungchang chu February 23, 2026 khan CBI-ah an refer tawh tih a sawi.

“A ram neituin a chan a awm a, a commission titu pain a chan a awm a, an ccount-ah a lut a, a chhui theih reng a, chu an account atang chuan khawiah nge a chhuah leh tih an rawn chhui dawn a, a luhna account neitu tu chu bânah i ti ang aw,” tiin a sawi.  

Chief minister chuan a sawrkar chu mahni flagship programme kum khat chhunga thawk tan awm chhun a nih thu sawi bawkin, ZPM sawrkar hi Mizoramin sawrkar a neih tawh zawng zawngah electric bill tipung lo awmchhun an nih thu a sawi bawk.

Sawrkar hnathawk hlawh a huna an pe theite chu lawmawm an tih thu leh kohhran hote pawhin Pathian ram ip a hun pangngaiah an hawng leh thei ta niin chief minister chuan a sawi a. “Kum 2024 krismas present-ah sawrkar hnathawkte DA 4%-in kan tihpunsak a, nikum krismas dawnah 4% bawkin kan tipung leh a, tun April 1, 2026 atangin 2%-in kan tihpunsak leh dawn a ni. Sum harsa chung chungin sawrkar hnathawk min tawiawmtute hi kan tih theih ang ang tihsak ve kan duh,” a ti bawk.

Mizoram a awm hnua health care tha ber siam chhuaktu sawrkar an nih thu leh hei aia tha a la awm ngai reng reng loh thute sawiin chief minister chuan, work order tel miah loa hnathawh pakhat mah an sawrkarah a awm ve tawh loh thu te, chutiang bawkin advertisement awm loin hna pakhat mah an lak ve tawh loh thu te a sawi bawk.