Lengpui ram hralh danah dan lam an ngaihtuah tawh lo, sum ei ringawt kha an ngaihtuah a ni

ZALEN Feb 16, 2026: Vawiin hian MNF chuan Vanapa Hall-ah Aizawl Municipal Corporator thlanna neih tura MNF candidate puanna hun hman a ni. Zoramthanga MNF President chuan AMC bial 19-a MNF candidate turte hi a puang.

Zoramthanga chuan thusawiin, MNF candidate puan chhuah takte chu chhuanawm an tih thu a sawi a. "MNF candidate kan puan tawh zawng zawngah a chhuanawm ber pawl an la ni tlangin ka hria. An chanchin kan ngaithlak khan an chhuanawm zia a lang chiang hle a. An Ward ṭheuh mipuite an vote hlu tak lo hlan ṭheuh turin ka ngen a. Pathian leh mipui zarah hnehna kan chan ngei ka beisei a ni," a ti.

MNF President chuan ZPM chungchang sawiin, "Kan ti ang, an tih zawng zawng an ti lo a, kan ti lovang, an tih zawng zawng an ti," a ti a. "ZPM sorkar hi Zoram mipuiin an kham ta hle. Sinlung Hills inthlanah an tla a, VC/LC inthlanah an che ṭha lo a, Dampa bialah ruling an tla leh a, Lai District inthlanah MNF pakhatna kan nia, Ruling pathumna an ni. Mipuiin enchhin party an kham der tawh tih a chiang hle," a ti bawk.

Zorama chuan, "Lengpui ram Airforce hnena Lengpui ram hralh to lutuk kha a mak em em a. Hman aṭangin Airforce hian ram lei tur Congress leh MNF hunah pawh khan an zawng a. A ṭha alawm, a thuphungin kan ti. An tih tak takna erawh chu May ni 15, 2025, khan Preliminary notification a chhuak ta a. An ram lei tur ZPM sorkar-in a zawng a, bul an ṭan ta tak tak a ni. Social impact assestment danin neih ngei ngei tur a tih kha nei ta lovin, Revenue Minister khan a ṭul love, a tiin a cancel hmak mai a ni. Parliament dan siam ZPM minister pakhatin a ṭul lo, lo tih ve ngawt tur a ni lo," a ti a.

"Final notification chhuah a nih hmanin vaibelchhe 188 chuang zet kha Aizawl DC account-ah an lo chhung hman vek tawh a. A dik lo lutuk a ni. Pawisa dah vek tawh hnuah final a chhuak, an kal khalh tir. An pawisa dawn tur an hmanhmawh lutuk a ni. A zia lo ngawt mai. Court-ah engtin tak sawi ang mawle," a ti bawk.

"Kha ram lei danah khan dan bawhchhiatna a nasa hle a. Dan lam an ngaihtuah tawh lo, sum ei ringawt kha an ngaihtuah a ni. CBI-in a la chhui ang a an buai khawp ang. Khatiang titute kha AMC-ah rorelna kan pe leh ang em?," tiin zawhna a siam bawk.

MNF AMC CANDIDATE TE:

1. Ward No. I - Pu CL Biakhlua, Durtlang.

2. Ward No. II - Nl K Lalnunpuii, Bawngkawn

3. Ward No. III - Pu K Romawia, Ramhlun North

4. Ward No. IV - Nl R Lalnunthari (Nunui Rualhleng)

5. Ward No. V - Dr Abisak Vantluangpuii Ralte, Chanmari

6. Ward No. VI - Tv Lalhmangaiha Renthlei, Hunthar

7. Ward No. VII - Upa Vanlalneiha, Zembawk

8. Ward No. VIII - Pu Lalbiakṭhuama, Armed Veng South

9. Ward No. IX - Pi B Lalawmpuii, Chhinga Veng

10. Ward No. X - Pu Lalrinmawia Sailo, Zonuam

11. Ward No. XI - Pi Varthannguri Sailo, Chawlhhmun