ZALEN January 19, 2025: ZPM chhung inkhawma vawiina thusawitu Adviser to Chief Minister TBC Lalvenchhunga, MLA chuan senior journalist HC Vanlalruata thu ziah, 'Lengpui Ram IAF Hnena Hralh' a ziaha zangnadawmna cheng vaibelchhe 187.90 dawn chungchang chu sawrkar hmasa lam huna tihfel vek niin a sawi a, IAF ram lei leh hralh hi Lengpui ram chauh ni lovin Sihphir ram acre 5 a tel tih a sawi bawk.

"He thil hi kan sawrkar hma thil a ni a, Assembly House leh Ignite Studio-a party tin te sawihonaah ka sawi chhuak tawh bawk. Sawrkar hmasa huna teh fel leh tih fel vek tawh a ni," Adviser to Chief Minister chuan a ti. Tun sawrkarah zangnadawmna pawisa hi sawrkar laipui lam atangin a lo thleng a, pek a ni ta niin a sawi.

TBC Lalvenchhunga chuan sawrkar hnen thleng loa ram hralh theihna DC 'level'-a a zo vek thei chu mak a tih thu a sawi a, "Ram hi 'direct'-in an lei a, sawrkar thleng lo a DC 'level'-ah a zo vek mai a, tun IAF ram leiah pawh hian DC 'level'-ah a tawp vek. 'Direct purchase' a ni a, DC hian Collector an nih avanga 'final' mai an ni a, cheng vaibelchhe 187.90 khan an hralh thei tlat a ni," tiin ram hralh leh zangnadawmna chungchang a sawi.

Congress MLA C. Ngunlianchunga'n an party office-a Chief Minister Lalduhoma'n leiba chungchangah sum dinhmun hre lo anga a sawi chu eptu MLA hian a hriat loh vang zawk a nih thu TBC Lalvenchhunga hian sawiin, "Sawrkar babu-a ziak si loh, leiba ni si hi a awm a, chu chu 'Committed Liabilities' an ti a. Hei hi works department ten an nei deuh bik a, PWD, PHE leh P&E ten department thuneihna china pawisa an lo hman kha a ni. Hemi ba rulh hi a nia kan Chief Minister-in a sawi kha. Nikum khan Committed Liabilities, sawrkar babu-a ziak loh department te lo hman, P&E bikah cheng nuai 6300 chuang kan rul a ni. Tunah pawh hian sawrkar babu-a lang lo, department thuneihnaa lo bat rulh kan la ngaih chu PWD cheng nuai 580 chuang, P&E rulh bang cheng nuai 1200 chuang, PHE cheng nuai 5800 leh tlem te a ni. Heng te hi kum 2017 te, 2018 te atanga leiba awm sa a ni,"a ti.

Adviser to Chief Minister chuan, "Heti a nih avang hian a hmaa EE chinin cheng nuai 100 an khawih theih te, CE cheng nuai 800 chin tih te hi anmahni thua tih ni ngawt tawh lovin, E-in-C in phalna an pe tur a ni, tih a ni tawh. Ni 15 chhungin Finance-ah an hriattir tur a ni, tih a ni ta bawk," a ti.

Sawrkar hmasawnna leh hnathawh tehna chu Capital Expenditure-ah a lang tih sawiin TBC Lalvenchhunga chuan, "Hmasawnna tur hnathawh Capital Expenditure-ah hian a lang a, SASCI hnaah nikumah za-a 10 tal hman turah zaa 20 kan hmang phak a, hei vang hian cheng vaibelchhe 200 kan dawn phah a ni," a ti.

Mamit District chhung Dampa A/C-a Dr. R. Lalthangliana'n zirtirtu 150 dah chhuah chungchang a sawi chu, "Leader of Opposition ni turin Education Minister hlui a bei nge ka ti a, a sawi te kha MNF sawrkar lai vek kha a ni si a. Anmahni an inbeiah ka ngai mai," a ti bawk.