ZALEN February 5, 2026: Mizoram Pradesh Congress Committee chuan Lengpui leh Sihphir a IAF te hnena ram lei leh hralh dan fello tak awmah CBI te hnenah chhui turin FIR kan thehlut.

He FIR hi DIG & Head of Branch,CBI/ACB, Imphal, Lamphelpa, Near DC Office, Imphal-795004, Manipur address-in Aizawl Unit CBI ah thehluh a ni a, MPCC Action Committee Secretary leh MPCC General Secretary Lalhmachhuana te hminga thehluh a ni.

MPCC chuan he ram lei chungchang hi CBI te chhuitir ngei kan phut tlat a, chumi bakah an sawi ang ngeiin CBI te hnenah General Consent pe turin an ngen bawk.

February ni 4, 2026-a Council of Ministers meeting in Indian Air Force ten Lengpui leh Sihphir ram an lak chungchang ngaihtuah hovin an sawiho zui nghal a, mipui ten thudik an hriat theih nan hemi chungchangah hian CBI kohluh ni se an ti hi a vanduaithlak hle in an hria.

Sawrkarin Anti-Corruption Branch ah Police a nei reng chungin anni ringzo lovin CBI kohluh a ngai an tihnaah hian Home Minister in a enkawl Home Department chungah rinna an nghat zo lo em ni? tiin zawhna an zawt.

Congress chuan Mizoram Sawrkar hian a duh anih chuan ACB kaltlangin heng ram lei leh hralhna a sulsutu bera ngaih Henry Lalremsanga Hlawnmual mantang eitute an awm a nih chuan a chhuichhuak thei a ni, an ti.

Congress chuan, "Hetiang thil chhuichian ngai tihnuhnawh leh tur siin engvangin nge heng ram te hi hmanhmawh taka IAF in an acquire theih tura hmanhmawh taka hma la nge an nih tih hi kan zawhna a ni a, ZPM sawrkar hi an intiam ang ngeiin February thla ral hma ngeiin CBI hnenah General Consent pe leh turin kan phut a ni," an ti bawk.