Lersia Play Top Chart tihchhuah a ni leh ta a, August thla chhunga film hralh kal ber chu Zote Entertainment kutchhuak 'Thaibawih' a ni. Thaibawih film hi tlangzarh atanga ni 2-na lekah a leakout nghal a, social media lamah a darh nasa hle - heti chung hian August thla chhunga sum lalut hnem ber a ni tho. 

Thaibawih film hian a leakout hma khan Rs. 10 lakhs vel a lalut hman a, leakout lo ta se chu sum a hailut hnem khawp ang le. In-House Production film 'Pa Hausa' khan July thla khan chart-ah dinhmun sang ber a luah a, Rs. 52 lakhs a lalut nia tarlan a ni. Thaibawih hi leakout lo ngat se heti zat hi chu a lakluh ve mai a rinawm hle. 

August thla bikah hian tun hnaia film chhuak thar 'The Ghost Hunter' chuan pahnihna a rawn luah nghal a, pathumna chu 'Pa Hausa' bawk a la ni. 'Mo Kawr' leh 'Mimi' ten an dawt a, 'Tawki' chu parukna a ni. An tlangzarhna rei deuh tawh mah se 'Brother Zova' chu top 10-ah a lang a, 'Archangkawm', 'Vawmva' leh 'Nukawki Pasal' te an lang ve bawk.