Aizawl December 13, 2022: UD&PA Department-in LGBTQI Shelter, Aizawl Sakawrtuichhun hmuna sak tura tender a chhuah tawh chu nimin khan cancel a ni a. He Shelter sakna tur cancel a ni leh ta hi MNF chuan lawmawm an tih thu thuchhuah an siamah an tarlang.

MNF chuan he LGBTQI Shelter Cancel a nih theihna tura hmalatu Chief Minister Zoramthanga leh UD&PA Minister, Dy. CM Tawnluia chungah lawmthu an sawi tih an tarlang bawk.

MNF chuan, "MNF Party hi sakhaw tih bik nei a ni a, 'Pathian leh kan Ram tan' tih thupuia neitu a ni a.  Kristian-te Pathian hi MNF-in Pathian a tih chu a ni a. Pathian duh loh zawnga ram leh hnam chimral tumna awm thei leh Kristiante rinna pawlhdal thei ang zawnga chetna chu MNF chuan a do zel dawn a ni," an ti bawk. 

Mizoram sawrkarin NE & Himalayan States te inelna SPARK Incentive Award 2019-20 FY-a lawmman pahnihna a dawn avangin LGBTQI te awmna tur chu Sakawrtuichhun a sak turin Ministry of Housing & Urban Affairs chuan ruhmanna a rawn siam a, tender pawh tihchhuah a ni hman a, December 6, 2022 khan Tender no.14/DTE(UD&PA)/Tech/2022-2023 chu tihchhuah a ni a, hei hi nimin khan cancel a ni ta a ni.