Aizawl: Mizoram State Central Library hotute chuan an duhthusam ang tlawhtu an neih loh thu sawiin mipuite chu library hmang tangkai tur leh lo tlawh tam turin an sawm tih Zalen an hrilh. Zirsangzuali, Assistant Librarian chuan Zalen palai zawhna chhangin library tlawhtu chu an tlem thu leh a tam thei ang berin tlawh se an duh thu a sawi a. A tlawhtu tam zawk chu zirlai naupang an nih thu sawiin a chawhrualin nikhatah zirlai naupang 30 velin an tlawh a, puitling chu ni khatah 20 vel an nih thu a sawi bawk. Mizoram State Central Library building hi tihlen thar niin hetah hian career guidance section, audio/visual room leh internet centre te a awm thar dawn niin Assistant Librarian chuan a sawi a. Hei room hi competitive exam bei turte tana tangkai tak a nih dawn thu leh pawisa awm dan azirin update thei ang bera competitive exam atana pawimawh lehkhabute dah a nih dawn thu a sawi a, zirlai inbuatsaihte chu tlawh theuh turin an sawm niin a sawi bawk. Library-ah hian Mizoram chhunga cheng (permanent resident) te tan member a nih theih a, tunah hian member 6376 an awm mek a ni. Zirsangzuali, Assistant Librarian chuan mipui a tam thei ang berin library lo tlawh se an duh thu leh an sawm thu a sawi a. Thalaite chu lehkhabu chhiar ngaina tur leh social media leh technology lama tlan mai mai loin lehkhabu chhiar lamah tan la tura a duh thu a sawi a, “Hei hi ram hmasawnna atan pawh a tangkai a ni,” tiin a sawi.