Libya-a tui lian rapthlak taka chhiatna thleng chu a nasa hle a, khawchhak lama lawngchhawlhna khawpui, Derna-ah ringawt pawh ruang 1,000 chuang hmuh tawh a ni tih a tlawhtu sorkr hotu lianin a sawi.

“Ruangte chu hmun tinah a let pheng phung a ni,” tiin khawchhak lama minister pakhat chuan Reuters news agency a hrilh.

Mihring 1,00,000 chuang chenna, Derna hi tuikhuah pahnih leh lei pali a chim hnuah tuiin a chim vek a ni.

Red Cross chuan Storm Daniel a thawh hnuah nasa taka tui lian zuiin mi 10,000 vel chin hriat lohvin an la awm mek tih an chhinchhiah.

Daniel hi Pathiannia thawk kha niin khawchhak lama Benghazi, Soussa leh Al-Marj khawpuite pawhin an tuar na hle.

“Derna-a ruang hmuh tawh hi 1,000 chuang a ni tawh,” tiin  Aviation Minister Hichem Chkiouat chuan Reuters hnenah phone-in a sawi a, ani hi khawchhak lam sorkar hnuaia emergency response committee-a tel a ni bawk.

“Khawpui 25% chu hmuh tur a awm tawh lo ti ila ka uar lutuk a ni lo vang, in tam tak a chim a ni,” a ti. 

Libya-a International Federation of Red Cross and Red Crescent Societies (IFRC) hotu, Tamer Ramadan chuan thi hi ‘an tam hle dawn’ tiin a sawi bawk.

An thenawm, Tunisia atanga video link-a biaknaah, “A hmuna awm kan team-ten eng chiah nge dinhmun an la thlithlai mek zel a, a zat chiah sawi theih kan la nei lo va. Chin hriat lohva awm mek erawh chuan 10,000 a kai tawh,” a ti.

A hmain Eastern Prime Minister Osama Hamad chuan thi chu mi 2,000 an tling tawh tih Libyan TV channel-ah a sawi a, “Derna-a veng thenkhat chu a mi chengte nen an vaiin an bo vek a,  tuiin a la vek a ni,” a ti.

Khawchhak lam bakah hian khawthlang lama Misrata khawpui pawhin tui lian hi a tuar na hle.

Libya hi an rama rei tak ro lo rel tawh, Col Muammar Gaddafi-a paih thlak a niha kum 2011-a thah a nih hnuah khan rorelna chelh lailawktuten ram an insem a. Khawvel chuan an khawpui, Tripoli a\anga roreltute chu a pawm a, khawchhak lamah sorkar a ding bawk.

Libyan chanchinbumi pakhat, Abdulkader Assad chuan sorkar pahnih awm hian khuarel chhiatna a thlenin chhawmdawl hna a muan phah a, mi mangangte chu an mite zawk ni lo ve ve-ah an ngai lui thin niin a sawi.

“Rescue team an awm lo va, Libya-ah hian zir chhuak chhanchhuaktu pawh an awm lo. Kum 12 liam ta chhung zawng kha chu indona vek a ni ringawt mai a ni,” tiin BBC a hrilh.

“Libya-ah hian sorkar pahnih a awm a, chu chuan puihna kalpui a timuang sawt zawk a. Puihna tiam ni thin mah se a tak a thleng thin lo,” a ti.

Tripoli atanga roreltute hian thlawhnain tonne 14-a rit damdawi leh body bag bakah doctor leh nurse 80 chuang a thawn tawh.

US special envoy to Libya, Richard Norton chuan Washington-in Libya khawchhhak lamah UN leh Libyan thuneitute nen tanghovin puihna a thawn dawn thu a sawi.

Egypt, Germany, Iran, Italy, Qatar leh Turkey pawhin puihna an thawn tawh thu leh thawn tura an inpeih reng thu an sawi hlawm.