Cristiano Ronaldo chuan football khelh a chawlhsan har tawh loh tur thu sawiin, a hun tak erawh sawi chian a harsat thu a sawi.

Dubai khawpuia Globe Soccer Awards semnaah kum 38 mi hi a tel a, chawimawina pawh a dawng ve nghe nghe a. Hetah hian inkhelh chawlhsan a tum hun an zawt a, rei a nih tawh loh tur thuin a chhang a ni.

Al-Nassr forward chuan, “Football hi ka chawlhsan har tawh lo ang a, engtikah chiah nge ka chawlh dawn tih chu sawi theih a la ni rih lo a, rei lutuk chu ni tawh lo turah ka ngai,” a ti.

“A hnai tawh tia ka sawi hian kum 10 pawh a la ni mai thei. Ka ti mai mai a nih kha, chuti taka rei chu a ni tawh lo ang a. Hun han kal zel se, a hriat theih chauh ang,” a ti bawk.

Portuguese star hi thla tharah kum 39 a ni ve tawh dawn a, tunah hian Saudi Pro League club Al-Nassr tan a khel mek a. Nikum January thlaah khan tuna a khelhna club hi £ maktaduai 175 vel bawr nia sawiin a zawm a. 2024-25 season tawpah a contract neih a zo ang a, kum 40 a tling ve tawh dawn bawk.

Global Soccer Awards semnaah hian Ronaldo chuan mi 12 hming chhawp chhuahna ‘Best Middle East Player’ chawimawina a dawng a. Saudi Pro League kal mekah goal 20 a thun tawh a, goal thun hnem ber a ni mek a. Amah hnaih bertu, Aleksandar Mitrovic aiin goal thumin a thun hnem mek a ni.

Kum 2023 khan Ronaldo hi goal thun hnem ber niin ram leh club tan kum tluanin goal 54 a thun tling a. Khatiang zat goal a thun theih avang khan ‘Maradona Award’ a dawn phah a, Kylian Mbappe, Harry Kane leh Erling Haaland te aiin a chungnung a ni.

Dubai khawpuia chawimawina an semnaah hian Ronaldo chuan ‘Fan Favourite’ chawimawina pawh a dawng tel a ni.

Chawimawina sem zanah hian Ronaldo chuan Saudi Pro League chu a fak hle bawk a, khawvela league ropui zual zinga a tel phak thu sawiin, France rama league sang ber, Ligue 1 ai pawha chungnung zawk niin a sawi.

“Saudi Pro League hi Ligue 1 aiin a hniam miah lo a, inelna boruak pawh a sang zawk daih a. Heti lai hmunah hian kum khat hun ka hmang ve tawh a, hei hi chu ka sawi chiang ngam ngat a ni. Tunah chuan French league aiin kan chungnung tawh zawk tlat a ni,” a ti.

“Al-Nassr-ah hian ka hlim a, ka zawm fuh hi ka ti khawp mai a. Saudi Pro League hian hma lam a pan mek a, nakin lawkah chuan khawvela league ropui zual pathum zingah a tel vat ang,” a ti bawk.