American rap rock band lar Limp Bizkit chuan European tour an neih tur chu an sawn hla tih an puang a, tun nipui chhung chuan tour hi an neih a rinawm tawh lo. Tour an sawn hlat chhan hi an frontman Fred Durst hriselna dinhmun that loh vang a ni. 
 
Band member panga awmna Limp Bizkit hian UK leh Europe ram hrang hrang fangin tour neih an tum a, mahse kum 51 mi Fred Durst chu a hriselna dinhmun a that loh avangin an tihlawhtling thei dawn rih lo. Engtikah nge tour hi an neih leh theih dawn hriat a ni lo bawk. 

Hemi chungchangah hian video an tichhuak a, fan te hnenah hritthiamna an ngen. Fred Durst hi a doctor chuan chawl rih turin thu a rawn a, tour an neih tur pawh hi an kaltlangpui thei dawn ta lo a ni. Ruahman dan chuan September hian UK-ah bul tan tur an ni a, London bakah Birmingham leh Manchester-ahte concert nei tur an ni. 

Durst, Sam Rivers, John Otto, DJ Lethal leh Wes Borland te hian England bakah hian Germany, Austria leh France te tlawh turin an ruahman bawk - mahse fan ten dawh thei taka an nghah rih phawt a ngai dawn ta a ni.