Argentina-in nikuma World Cup nomawi an lak tuma Lionel Messi-a’n a hak jersey paruk chu lilam a ni dawn.

Captain kum 36 mi, Messi-a hian Qatar-a nikum December inelnaah khan final-ah penalty pet hmanga France an hneh hnuah nomawi a chawi.

Kha tournament-a a jersey hak an hralh tur zingah hian final-a a hak pawh kha a tel dawn a, New York-a Sotheby’s-in an lilamnaah hian £ maktaduai 8 chuanga hralh theih an inbeisei.

Inkhelhnaa hak football jersey hralh to ber chu Diego Maradona-a’n ‘Hand of God’ goal a thunna kawr kha a ni a, kum 2022 khan £ maktaduai 7.1-in an hralh a, Messi-a kawr hian a khum ngei an ring.

Sotheby’s-a modern collectibles hotu, Brahm Wachter chuan, “2022 Fifa World Cup kha infiamna chanchina ropui ber zinga mi a ni a, Messi-a zinkawng ropui tak nen a inkungkaih tlat a, player ropui ber (greatest player of all time) a nihna a nemnghehna a ni bawk,” a ti.

Vawi riat zet Ballon d’Or dawng tawh, Messi-a hi World Cup chanchina tournament pakhata group stage, last 16, quarter-finals, semi-finals leh final-a goal thun vek thei hmasa ber a ni.

Wachter chuan, “Sotheby’s tan chuan hetiang thil hlu lutuk vantlang hmaa pho chhuaktu nih pawh a lawmawm,” a ti.

Messi-a kawr hak hnu an hralh turte hi Sotheby’s New York headquarters-ah a thlawnin en theih a ni a, tute tan pawh lei tumin chhan theih a ni a, chhan hun hi November 30-ah hawngin December 14 thleng chhan theih a ni ang.

2022 World Cup-ah khan Argentina inkhel vawi sarihah inlan vek mah se group stage-a inkhel pathuma pahnih chauh lilam a ni dawn a. Pakhat hi chu Australia squad-a mi, Cameron Devlin chuan Barcelona forward hlui hi a jersey a thlengpui daih a ni.

Sotheby’s chuan, “Lilamnaa sum hmuh thenkhat hi Leo Messi Foundation puihna nen Unicas Project pakhat, Sant Joan de Deu (SJD) Barcelona Children’s Hospital hnuaia mite hnenah hlan a ni dawn a, natna vâng bik vei naupangte tan hman a ni ang,” an ti.