Paris Saint-Germain (PSG) superstar leh Argentinean icon Lionel Messi hi feet 5 leh inches 7 a sang a ni a, hei hi centimetre 170 bawr vel a ni. Mi tam tak chuan Lionel Messi hi football chanchina player tha berah an ngai a ni. Ballon d’Or award pasarih a dawng tawh a, club leh ram tan trophy tam tak a chawi tawh bawk a, khelmual chhunga a che vel en chuan a mawh hran lo.

Argentinean hi feet 5'7" chauh a ni chungin, ama thiamna hmang ngeiin a hming a chher a, footballer tha ber pawlah a indin chho thei hi a ngaihsanawm hle a ni. An ram chhunga mipa san zawng chawhrual chu 5'8 aia sang niin an sawi.

Messi hi a naupan lai atang tawhin La Pulga tih hming lem hmanga hriat lar a ni tawh a, midang zingah a tet bik em vangin ‘the flea’ tia koh a ni thin. 

Messi hi kum 11 mi lek a nih laiin growth hormone deficiency (GHD) natna hlauhawm tak a vei tih hmuhchhuah a ni a, chu a natna vang chuan he forward hi chutih laia a kum rualpui a aiin a te/tawi zawk fe a ni. 

Argentinean club pahnih River Plate leh Newell's Old Boys te chuan Messi-a football thiamna leh a theihna hi chiang takin an hmuh sak a, mahse, thang lian zel tura a enkawlna tur sum tam tham tak a ngaih avangin an la ngam lo.

Club ropui Barcelona an lo lang a, beiseina sang tak nen a natna zawng zawng enkawlna senso chawi huamin Messi chu La Masia academy lamah an hruai ta a ni. Chutia a taksa enkawl chunga football zirtir tura thu tlukna an siam chu football chanchina thutlukna siam fuh ber pakhat a ni hial awm e. 

Blaugrana-in enkawlna a pek ang hi dawng lo se, Messi hian cm 150 bak a pel kher lovang. 

Forward hian Catalans tan inelna zawng zawngah match 778 a khel a, goal 672 a khung bakah goal 303 a siamsak bawk. An club-a a awm chhungin trophy 31 a chawi pui hman a ni.

Messi hi Argentina player ropui berte zinga mi a ni bawk a, match 164 khelhah goal 90 a thun tawh. Nikum khan La Albiceleste hi Copa America nomawi a chawipui bawk. 

PSG player Lionel Messi  

Barcelona-in sum lama harsatna a neih vangin nikum khan Barcelona a chhuahsan a ngai a, club hausa Paris Saint-Germain (PSG) chu free transfer-in a zawm a, kum hnih daih contract a ziak. 

Kum 35 mi hi Les Parisiens tan inelna zawng zawngah vawi 45 a inlan tawh a, goal 17 zet a khung tawh. Chutih rualin a teammate-te tan assist vawi 23 a nei tawh bawk. 

Kum 35 mi Lionel Messi hian zawi zawiin a career tawp a hnaih ve tan tawh a, a boot a khai hmain eng chen nge hnuhma a hnutchhiah leh dawn a hriat rih loh.