India Hmarchhak chu lirnghing mai thei dinhmuna ding reng a nih thu sawi rik a ni fo a, Mizoram pawh lirnghing pawi khawih tham awm theihna hmun a lo ni reng a, kumin chhung hian vawi 2 nghing tawhin kum thar tan tira mi chu kan thenawm Manipur atanga in tan a ni a, Zoram lei lung pawh a sawi hlawk hlawk a nih kha. April thla tira mi a hnuhnung ber kha a na ber zinga mi a nih a rinawma, mipui an phawk lek a, hlauhnain ram pum a tuam a, zan mutmu tuah lo an tam hle bawk a ni. Lirnghing hnuhnung ber khan ngaihtuahna a ti thui duh hle a. A aia na thleng ta se keini ram leilung hnip angah chuan a rapthlak khawp ang. Ko pang kham tak takah In kan din zung zunga, sak phalna lak dawna architect duan chu tam takin an zawm lemlo a, hnamdang mistiri te'n a harsa an tih tlat chuan a hlawh petu thu a tlawm zawkah a trang fo a, RCC In chhawng ding uaih zingah lirnghing laka him zawk eng zah tak awm ang maw? Nepal a lirnghing rapthlak tak khan mithiamte zir a hlawh hle a. Leilung hlawm pahnih innawk zel chu a hma aia na zawka innawr tawnin, lei chhung rilah na takin a pelh pup dawn niin mithiamte chuan an sawi a. Lirnghing zir mite chuan leilung innawk chuan India Hmarchhak lam a hnaih zel niin an sawi lawk tawh a, NE hnaih bawrah na takin a la nghing dawn niin an zirbingna te tlangzarh a ni tawh nghe nghe. Tun tum lirnghingah khan pawnah mipui an tlan chhuak chiam a. Khami aia na leh rei zawk a thlen palh chuan pawna tlanchhuak te chu kawng sir tawna chenna In/dawr tlu te chuan a delh emaw a ni anga, kawlphetha, ei leh in leh nitin mamawh a awm mang dawn lo a. Chhanchhuah hnathawktu an indaih lo viau thei a, chu a chhapah dan kenkawh thlengin a nghawng thei bawk ang. A nihna takah chuan tih theih a tam lo hle a, hriat lawk theih a ni loa, dan theih a ni hek lo a, a thlen lai leh a hnua insaseng danin nunna chan a ti tlemin a ti tam thei a; a chhe zawnga a nghawng tih tlem hi tih theih tawk ni berin a lang. Kan khawpui chenna hi felfai taka duan a ni lem lo a, hei hi a ti khawlh khamtu a ni thei bawk ang. Thuneitute hian hemi rilru pu chung hian chenna tlak loh ram thliar thain khawng takin keng tlang thei se a duhawm hle mai. Khawpui zauh thuah pawh dan leh hrai tha tak duana, In sak dan him zawk a awm zel theih nan hmalak a hun ta hle mai. Lei che laka kan him zawk nan In satu mistiri te chu zirtirna /training pek theih ni sela thawk lak a theih deuh mahna. Mistiri te pawh an thiamna ang zela phalna license pek ni hial tawh zawk sela kan hma hun a thlamuanpui awm deuh thei zawk ang. Ngaihtuah ngun a ngai hle a, policy thar duan tham a awm ngei ang. Tun lai hian social media-ah lirnghing damkhaw chhuah pui theih dan zirna thar tlawhchhanin mithiamte thu chhuak nia sawi a darh mek a. He thu darh mek hian thil thar a tarlang nual a, inzirtirna hman mek chu a him tawk lo mai ni lovin a aia him zawk tarlan a ni a. Thu dik nge a hrul tih hriat a har hle. Chhiatrupna laka him theih dan tunlai thiamna tlawhchhan hmantlak a awm a nih chuan mipui hrilhhriata zirtir vat a tha ber a. Insaseng dan tha zawk mipui inzirtirnaah sum sen a ngai thei a, sum harsat lai ni mahse a tak a thlen palh chuan sum humna a ni thei zawk ang. In zirtir tam kan la mamawh hle a, tha thlah thian a ni lova, tan lak sauh sauh a ngai zawk ang. Engpawhnise a pawimawh ber chu chhiatrupna a lo thleng palh anih pawhin ‘Chiailoh’ hi a ni. Lirnghing a ni emaw kangmei, thlipui leh a dangte a lo thleng palh anih pawhin rilru fim taka hmachhawn a tha. Mithiam ten hmarchhak hi lirnghing nat theihna ber hmun (Zone V) niin an sawi a, kan in sak dan kan uluk lehzual a pawimawh a. Chumai bakah lirnghing lo thleng palh laka kan buai lutuk lohnan ei leh in, damdawi, tui leh nitin mamawh zualpui te lo inchhekkhawl nachang hria ila, chhungkua ah tam zawk inzirtir bawk ang u.