Aizawl; Mithiamte chuan lirnghing na tak thlen thulhah Aizawl khawpui chu a him tawklo hle tih an sawi a. Disaster Manegement & Rehabilitation Director Lalpek sanga chuan mipui ten building leh property te insurance uar se a duh tih a sawi. Zalen palaiin a biak naah Geology & Mineral Resources Director Dr. Lallenmawia chuan Mizoram chu lirnghing nat theihna ber 'zone V' a awm nia sawiin engtik lai pawha a nghin theihna hmun anih thu a sawi a. "Mizoram leilung hi a piang tlaiin a naupang a, a ngheh loh bakah a muk lo hle a. Ruahtui tamna ram a ni a, ram awih a nih bawk avangin a himlo thei hle a ni," a ti. Dr. Mawia chuan Mizoram leilungin a zir loh piah lamah in sak nan rod leh cement tha lo te mipui ten an hmang a, a foundation leh design te an uluk loh bawk avangin a himlo hle tih a sawi a, "richter scale 6 leh a chunglam lirnghing palh ta se zan anih chuan mi 20,000 vel leh chhun anih chuan mi 6,000 vel an thi mai thei niin mithiamte chuan an sawi a ni," a ti. DM&R Director pawhin richter scale 7 chin chunglam lirnghing hi second 10 lek pawh lo thleng se Aizawl khawpui chu a ngaihtuahawm hle dawn tih Zalen a hrilh a. "Lirnghing na tak hi lo thleng ta se mi 18,000 vel lai an thih theih bakah chhanchhuahna hna thawk tur pawhin building tlu in kawng a hnawh dawn avangin chet lak a har dawn a, hliam te damdawiin panpui a theih dawn loh avangin kan rin ai hian a rapthlak viau thei a ni," a ti. DM&R Director chuan Department lam atang chuan chhiatna lo thleng thei laka mipuite zirtir bak chu tih theih an nei tam lo tih sawiin, "Building chhe vek te hnenah Rs.75,000 thleng chauh kan pe thei a, thi an awm pawhin Rs.1,50,000 thleng bak kan pek theih loh avangin mipui te hian an in leh bungrua te insure na chang hria se kan duh a ni" a ti. DM&R Director chuan chhiatna liantham lo thleng laka chhanchhuahna hna thawktu tur bik State Disaster Response Force (SDRF) mi leh sa, Police Battalion 7 atangin mi 660 training chhuak an nei tawh nia sawiin tunah hian training lai mi engemaw zat an la awm tih a sawi a. Heng mite bakah hian Central YMA nen tangrualin chhanchhuahna hna thawktu tur bikte tan training tum 53 an pe tawh tih a sawi bawk. Hetih lai hian Science & Technolgy hnuaia Mizoram Remote Sensing Application Centre-a an hotupa Dr. RK Lallianthanga chuan lirnghing chu a hlauhawm rualin insawithaih ai chuan fimkhur taka thil kalpui chu a tihchi zawk nia a ngaih thu Zalen a hrilh.