ZALEN October 8, 2023 : Sawrkar laipuiin mihring phur lirthei chi hrang hrang taxi, maxi cab, bus leh rental car ah te an awmna chin hriat theihna Vehicle Location Tracking System (VLTS) vuah vek tura thupek a tihchhuah kal zelah Zirtawpni thleng khan Mizorama lirthei 32-ah vuah a ni tawh.

ZALEN thudawn danin VLTS vuah tawhna lirtheite hi tun hnaia permit thlak (replace)-te an ni a, an vai hian Maruti nia thudawn a ni.

Hetih lai hian transport department chuan an bus 23-ah VLTS hi an vuah tawh a, tuna bus an neih dang, TATA ho chu registration an tihfel hunah an vuah leh dawn niin an sawi a. Mizoram sawrkar department zingah transport department chiahin VLTS hi an la vuah a, department dang bus-te pawhin an vuah vek a ngai dawn a ni.

VLTS hi January 1, 2019 hnu lama taxi leh passenger phur lirtheite chuan an vuah ngei ngei a ngai a, hemi atan hian transport department chuan hriattirna pawh a tichhuak tawh a. August 22, 2023 hmaa vuah fel vek tur niin VLTS hman atanga thla 12 chhunga an vuah lo a nih chuan fitness certificate pek theih an ni tawh dawn lo a, an permit pawh replace phal a ni dawn lo a ni.

VLTS khawl hi Rs. 12,000 vel tura ngaih a ni a; mahse, hetih lai hian Maruti company-ten an hman erawh a siam dan a that deuh vang leh wire awm lo chi a nih avangin a dang aiin a to deuh niin transport department thawktute chuan ZALEN an hrilh.

Vehicle Location Tracking System (VLTS) hi khawl tereuhte niin lirthei khalhtu leh a mi phurh (passenger) te inkarah dah/vuah a ni ang a. Passenger ten engemaw buaina leh harsatna an tawh chuan chu khawl a hmehna awm (button) chu an hmet ang a, chu signal chu command and control centre leh emergency response support system team (Police) te nen thlunzawm a ni a, helaia duty te hian an lo chhinchhiah ang a. Lirthei awmna, a tlanna lam, a tlan chak zawng, motor registration number leh a neitu kha a hriat theih dawn a ni.

VLTS hi mihring phur chi lirthei ah vuah vek tur tih a ni chungin two wheeler taxi leh auto rickshaw te erawh a huam dawn lo a ni. VLTS hi passenger phur chi lirthei te chuan an lei tirh atangin an vuah ngei ngei a ngai dawn a, hemi tel lo chuan lirthei an ziaklut (register) thei dawn lo a ni.

Tunhnaia State Transport Authority meeting chuan Passenger/ khualzin phur lirthei te tan a one time replacement policy a kalpui mek chu ennawnin ni 5.7.2023 hma lama register tawh bus, maxi cab, four wheeler taxi, auto rickshaw leh two wheeler taxi te chu replacement vawi hnih a phalsak.