Aizawl: Mizoram Pollution Control Board atanga thudawn danin Traffic Police-in Zero Tolerance Drive an hman thla December 2017 chhungin lirthei khu enfiahtir 7077 an awm.   December thla chhunga lirthei khu enfiah te hi 2 wheeler-4818, 3 Wheeler- 43, Light Motor Vehicle (Petrol leh Diesel)- 2137, Medium Motor Vehicles- 55 leh Heavy Motor Vehicle - 24 an ni a, a vaiin 7077 a ni. November 2017-ah khan lirthei 958 enfiahtir an awm a, December thlaa November aia a tam dawrh chhan hi Traffic Police-in Zero Tolerance drive an neih vang a ni tih sawiin pollution control hotute chuan lirthei khu chu kum khatah vawi 2 entir a ngai tih an sawi a, dan nasa taka lekkawh a nih veleh mipuiten an check-tir ta vak mai niin Zalen an hrilh. Lirthei khu enfiahtirtute hi an lirthei enfiahnaa a tlin zawh loh chuan ni 7 chhunga a siam ngai lai te siam tura tih an ni thin tih sawiin pollution control hotute chuan hemi chhung hian traffic police pawhin an man thei lo niin an sawi bawk. Lirthei khu enfiah tawh te hi thla ruk an lehkha dam mah se a khu a tama an hriat chuan dan lekkawhtuten an check-tir leh thei niin an sawi bawk. Pollution control hotute hian Zero Tolerance drive neih laia lirthei check-tirtu an tam avangin an site office-ho bakah anmahni office-ah lirthei khu enfiahna an hawng niin an sawi a. Lirthei enfiah dan hi October, 2017-ah 869 a ni a, November-ah 958 leh December-ah 7077 an ni a, January record a la awm rih loh thu leh Zero Tolerance drive tihtawp a nih rual rualin lirthei khu enfiahtirtu an tlem nghal dawrh thu Pollution Control hotute chuan Zalen an hrilh bawk.