ZALEN November 17, 2025: Lunglei leh Lawngtlai district-a bungraw phur lirthei pawlte thuchhuah siam chungchangah Aizawl district lama bungraw phur lirthei khalhtu ten thuchhuah an siam a, heng district pawl ho te hian an huamchhung atangin district dang lirthei te bungraw phurchhuah an phal lo a ni.

Lunglei District Commercial Vehicles Joint Meeting ten Lawngtlai District a lirthei neite laka an lungawi lohna chu hemi chungchang lo intanna a ni a, District pahnih te inrawnna pawh awm lova Ngenna leh Hriattirna an chhuah chu Lawngtlai District Tipper Association (LDTA), Lawngtlai District Pick-Up Association (LDPA) leh Mizoram Truck Driver Association (MTDA), Sub Hqrs. Lawngtlai te chuan an hrethiam lo a, an district chhung atanga district pawn lam lirthei te bungrua phurhchhuah hi an phal lo zui ve leh ta a ni.

February 2, 2025 khan Lawngtlai Deputy Commissioner chuan Commercial Vehicles Joint Meeting chu DC Conference Hall-ah a ko a, hetah hian Lunglei lam pawh koh an ni tih Lawngtlai lam lirthei pawlte chuan an sawi a, mahse, Lunglei lam hi an tel lo a, he meeting hian a hma atanga an lo kalpui tawh angin district dang lirthei ten Lawngtlai district atanga bungraw phurh chhuah chu an khap zui leh a ni.

LDTA, LDPA leh MTDA Sub Hqrs. Lawngtlai te chuan Lunglei District Commercial Vehicles Joint Meeting ten MZ-07 leh MZ-03 te Lunglei District chhunga bungraw phurh chhuah an remtih loh chu an pawmpui thlap a. Chutiang bawkin anni pawhin an district chhung atanga district dang lirthei te bungrua phurhchhuah an rem ti bik lo tih 21.2.2025-a Joint Meeting an neih chuan thutlukna an siam ve bawk.

Aizawl City Area chhunga Pick-Up Association hrang hrang (PODA/DTPODA/MPSA) chuan ngun taka an ngaihtuah hnuah LDTA, LDPA leh MTDA Sub Hqrs. Lawngtlai ten thuchhuah an siam atang hian district dang ten harsatna an tawk thin avangin District dang load lak phallo te chu Aizawl District chhunga Load la tawh lo turin 15.11.2025 khan thuchhuah an siam a. 21.2.2025-a Lawngtlai lamin thuchhuah an sut hma chu kalpui ve turin thutlukna an siam a ni.