November 5, 2023; Thawhlehni a Assembly inthlanpui neih turah vawiin a Lawngtlai atanga chhuak, Tuichawng biala Jarulsury Polling Station a inthlan buaipuiturte chuanna Maxicab MZ 07/2427 chu Chawngte piah Udalthana-I bul ah a chesual a, 4th IR a Constable Z. Lalmuanzuala chu a hmunah a boral

The Lawngtlai Post in a tarlan danin, Jarulsury Polling Party te chuanna Maxicab hi kawng chhovah a tanga, a chhunga chuangte chhukin an nawr a, an nawrchhuak maitheilo, lirthei tawlhlet chu kawngthlangah liamin Z. Lalmuanzuala hi a hnawl tel a, driver erawh a him.

Z.Lalmuanzuala hi Mamit Luangpawl veng a nih thu he veng VCP hian The Lawngtlai Post a hrilh a, Mamit Luangpawl Branch YMA chuan chhiattawh thu hi an puangzar tawh.

Vanduaina a thleng tih hriat a nih veleh Lawngtlai District thuneituten buaipui tur pawimawh te rang takin an buaipui nghal a, chanchin dang kimchang zawk ngaihven mek a ni.