Aizawl; Lirthei chhiah pek dan tlema tihdanglam tur a nih thuah mipuiin hman a nih hmain hrethiam se a duh thu Lalbiakthanga, Director, Transport Department chuan sawiin Central in a rawn tuk anga ti an ni tiin, chuti chung chuan motor chhiah pe tlem ber ber zingah Mizoram chu a la awm tho thu Zalen a hrilh. Kum 5 chhungin lirthei punna chu 13.60% niin kum liam ta chhungin Rs Nuai 2000 dawn a luh thu leh an hmalakna langsar zualte zingah Smart Card Driving Licences, online payment, bus service belh tirte niin hmalakna liantham a kal mek niin a sawi bawk. “Motor lei zah atanga chhutin 6% chhiah anga pek tur a ni a, kum 40 chhung a huama pek a ngai tawh lo anga ngaih a ni a. State thenkhat te thurualpui theih an nih loh avangin Central in tax rate hniam ber a tuka, 6% a ni a, a hmaa mi kha 4.5% vel niin san tura min nawrna a rei tawh a, dan hi peih tep a ni a, hman thuai kan inbeisei,” a ti a. Mi state ah chuan 15% lai te an lak thu Zalen a hrilh bawk. Online payment turin an inpeih tawh a, mipuiin intlar ngai lovin chhiah chawi tur awlsam tein an pe thei a, Bank Account hming leh number chhut luhin account atangin a in 'cut' mai thin a ni. Transport Department hian Bus 45 (Serciveable) a neih bakah hmun 19 ah tlantirin, 2014 chhungin hmun 4 ah a tlan thar tir bawk a, Serhmun, Khawlian, Tuipuibari leh Silchar (AC Deluxe) an tlan thar tir leh bawk a, a baka tlan te chu deluxe leh city ride ang chi an ni a, a tula tlan Mamit leh Champhai tlan turin bus 2 dah a ni bawk. Tuna hmalakna kal mek DPR siam tawh Institute of Driving Trainings and research chu inchiah mekin Nuai 1400 ruahman a ni a. " Kan in siksawiin kan insiam tha nasa a, nakin lawkah chuan driving license dil turin driving certifcate a ngai tawh ang,' tiin Department hotute chuan Zalen an hrilh.