ZALEN October 9, 2023 : Congress Party chuan Mizoram sawrkar hnuaia association ten harsatna an tawh te an sawrkar chuan chinfel ngei an tum thu an sawi a, One Time Replacement, tum khat chiah Replacement tih theih chu ennawn an tum a, Taxi te intlanchhawk dan tur pawh uluk taka ennawn an tum a, lirtheia eizawngte service hun tam zawk siamsak an tum.

MPCC Vice President Lalnunmawia Chuaungo chuan Congress Party chuan 5 October, 2023 khan Mizoram Maxicab Association, Aizawl City Bus Owner's Association leh Two-Wheeler Taxi Association te nen hmaichhana inbiangbiakna neiin 'Inremna Thuthlung' an siampui tih a sawi, Maxicab te permit One Time Replacement ang te chu Congress a sorkar chuan ennawn a ni ang a. All Mizoram permit tihtawp chu enenawn an tum a, a duh te tan All Mizoram permit pek an tum, tih a sawi.

Aizawl City Bus tana "Wheel-Base" 3400 mm - 3600 mm chungchanga harsatna tawh mek chu Congress party a sawrkar a nih chuan sawrkar dan dinglai angin 25 seater a nih chuan motor eng company pawh an hman theihna tura ruahmanna siam a ni ang, a ti.

Congress chuan Aizawl khawpuia Two-wheeler Taxi permit chu sawrkar mekin indipria vek khawpin a pe chhuak hnem a, intlan chhawk avangin an tuar nasa a. Intlanchhawk hi sawrkar in a tul a ti a nih pawhin sawrkar leh mimal two-wheeler te chauh inthlan zawk a nih theih nan ruahmanna siam a ni ang, an ti bawk.

Lirthei Pollution Test-na pawh lirthei neitute tana awlsamna zawnsakin Oil Depot remchangah dah tura hmalak a ni ang an ti a. Lirthei company thlan bik nei lovin MVI-in Public Service atana rin ngam nia a ngaih company dang dang siam lirthei hrang hrang te chu Maxicab leh commercial vehicles atana hman theih turin hmalak a ni ang an ti.

Congress party chuan commercial vehicle hmanga eizawngtute tan 'Ṭang Puihna' a chhawpchhuah sak an tum thu an sawi.