ZALEN Oct. 13, 2024; Mizoram Truck Driver Association (MTDA), Mizoram tipper neitu leh khalhtu pawl leh eirawngbawlna gas phurtu Mizoram Indane Driver Welfare te’n naktuk atanga lirthei din tir an tum chu an sut.

Aizawl leh Silchar inkar kawngpui dunga Sairang leh Durlui inkar kawng chhe zual pui, lirthei tluk hlauhawm khawpa khuar chhe laite siamthat a nih hma chuan Thawhtanni atangin tlan rih loh ni se an tih chu an thulh rih a. An thulh chhan hi helai siam mektu contractor hian a chhe zual lai hi ni hnih chhunga siamthat vek a intiam a. Chu bakah Mizoram Truck Owners’ Association hruaitute’n chak zawka kawng chhe zual lai siamthat a nih theih na’n zing lam dar 8 leh tlai lam dar 5 inkar chhung kawngpui khar rih tura Police lam nen an inrem avangin nawrh hi an thulh ta rih a ni.

Nawrh an tum chungchangah hemi hma hian lirthei khalhtu pawl pathumte hian thuchhuah siamin, tun thla ni 5 khan Sairang leh Durlui inkar kawng chhia hi October ni 9 hma a siamtha turin a siam hna thawktu NHIDCL hnuai a contractor-te a hrilh niin an sawi a. October ni 9, Nilaini khan a hmunah an zuk en a, hmasawnna duhthusam hmuh tur a awm chuang lo niin an sawi.

Tunah hian contractor-in ni hnih chhunga a chhe zual lai siam that a intiam avang leh chak zawka hna thawh a nih theihna atana Police lamin chhuna kawng an dan pin dawn avangin an nawrh tum hi an thulh leh ta a ni.