Traffic a jam lem lo, ka hmaah motor pakhat hi hmanhmawh lem lo takin a tlan a, engtizia nge ni chu aw? Traffic lah a jam bawk si lo va, kawng min kian mai bawk si lo va, inthlahrung tak chungin horn ka’n pe a, a hnu rei loteah min kian a, ka pelh dawn chuan min la en rum phian leh nghal, amah ka va en chiang chu mobile phone-in mi a lo bia a, a biak laiin a ding chuang bawk si lo, khalh chungin a lo be mawlh mawlh chu niin, a thiam lo zawk leh inthlahrung tura ngaih zawk khan rum deuhin min la melh khui khui zawk nia. Nun dan phung leh awmdan mawi kan va la hre lovin, lirthei khalhtu tam zawk hian zir tur kan va la ngah ve aw!! tiin ka ngaihtuah zui a, motor khalh chungin mobile phone biak loh tur a ni a, a hlauhawm a, tawhsual tawh pawh awlsam a ni. Mahse, lirthei khalhtu thenkhat hian kan zawm lo tlat mai hi a pawi khawp mai. Lirthei khalh chunga mobile phone hman hi a hluahawm: Lirthei khalh chunga mobile phone biak hi a hlauhawm a, accident awlsam taka thlentirtu a ni; chuvangin, dan pawh hian a phal lo a ni. Lirthei khalhtu tam zawk hi chuan khalhlaia biak danin a phal lo tih chu kan hre vek niin a lang, a chhan chu traffic police hmuh lai chuan kan be ngam miah lo, an hlau tlangpui a, man an hlau a, hauh an hlau tihna a ni. Mahse, traffic police awm lohna hmunah chuan lirthei khalh chungin kan be leh tho si a, dan kan ngai pawimawh lo va, dan kan zah tawk lo tihna a ni. Kan mi phurhte leh kan hnunga motor dang lo kal kan tibuai em tih pawh kan ngaihtuah lo ni berin a lang. Passenger phur motor khalhtute tan phei chuan motor khalhlaia mobile biak hi tih loh tawp a tha, dan kan ngaih pawimawh loh bakah a hlauhawmna kha kan hriatchian a ngai. A khalhtu chuan, “Ka chesual chuang lo vang, ka fimkhur tawk alawm,” a ti thei, kawng kawi laiah te leh motor dang pelh dawnah te chetsual a awl a, a hlauhawm hle a ni. Loh theih lova motor khalhlaia biak a ngai a nih chuan kawngsir zau laiah be mai ta zawk thin ila; tichuan, mi dang kan tibuai lo vang a, chetsual lakah kan him thei bawk ang. Bike khalh chunga mobile sik mawlh mawlh tawk lah hmuh tur an awm thin, danin a khap emaw khap lo emaw, mahni chhia leh tha hriatna hmang pawhin tih loh tawp tur a ni. Mi pangngai tan chuan han ngaihtuah vang vang pawhin thiltih chi a ni lo va, tih chi a ni lo kan tih rual hian mi pangngai tak nia hriatah pawh hmuh tur an tam mai, in la sang ve siho hian dan an bawhchhiat hian an khirh leh zual a, a chhan chu a chapo tawk chiaha an awm vang a ni. Engmah ni si lo, lo inlangeng ve ringawtho hi an khirh em em, an thiltih dik lo han hrilh ila, a thiam lo zawk ni ngei khan a thiam zawk kha a lim erh thin. Hetiangho hi ze tha lo, mi dang tana hnawksak an ni. Hmasawnna daltu leh dan palzamho hian hnathawh tur an titam phian lawi a… Motor khalhtu hawihhawm lo : Motor khalh chunga mobile phone an biak, hawihhawm lo nungchang zia kan sawi tawh a, motor khalhtu hawihhawm lo tak mai, nun dan mawi pawh hre lo kan ti dawn nge ni? Hmuh tur an awm nual thin. Hospital Road city bus stand atanga Babutlang pan chhohna kawng kual laiah sawn vawi khat chu kan inpel dawn a, kei a chhuk lam hawiin ka kal thla a, kawngkual a la hlat deuh avangin inpelh dan pangngai dik takin kan la inpel thei a nih hi tiin chutiang chuan pelh ka tum a, motor lo chho khan chutiang lo zawng chuan min pelh a lo tum niin, kan laklawh engtin tin emaw ni kan inpel ta, kan inpelh lai takin kha motor khalhtu ( A neitu ni awm tak) khan tawngkam nalh lo zet hian, “Mawl lutuk…”tih tawngkamin min rawn an khum nia mawle! A dik tak chuan kha pa khan mobile phone a khawih vang a ni. Muang takin a kawi leh zuk thin a, amah lah chu a la pawr em em zawk lehnghal, patling tak, mi pangngai tak niin ka hre bawk si a, thin a khei ve zak duh mai; mahse, khatiang mi hawihhlawm lo kha khin chiah ka ngai lem lo va, ka ngawihsan ta mai mai a ni. Vawikhat pawh ka hmaah bike hi zawi muangin a tlan a, han pelh dawnin a lai laklawh si a, kawng min kian bawk si lo va, horn kan hmet ri a, a hnu rei loteah chuan harsa zetin min kian ve tawk a ni. Ka pelh dawna amah kan en chuan mobile phone a lo sik melh melh mai. Lirthei khalhtu hawihhawm lo hi kan la tam ve viau a nih hi ka ti rilru a. Lirthei khalhtu nih chuan zaidam a lo ngai hle a, kan eizawnna a nih lek phei chuan kan hawihhawm hi kan tihmakmawh a ni. Driver hawihhawm lo lutuk chu mi dang tan an hnawksak thei a, thu hote-a inhauh vak te, insual ngam khawpa kan awm a nih chuan zir tur kan la ngah hle tihna a ni. Tih loh tur leh tih tur tih hi chu a tlangpui thuin kan hre ve nual a; mahse, kan luhlul nge ni, kan pawisa teh chiam lo niin a lang. Nungchang mawi tak kan lanchhuah theihna turin inzirtir peih ila, naupang zawkten aia upa zahna chang an hre tawh bawk si lo, tunlaiah phei chuan tlangval la nuapang tak takten lirthei an khalh tam ta zawk a, eizawn nan pawh an hmang hnem ta hle a ni. Mahni aia upa zawkte zah thiam se, “Ka dik alawm” tih avanga aia upate hawihhawmna lantir miah lova tawngkam mawi lo taka kan tawngkhum te hi a mawi lo va, Mizo nunzia pawh a ni lo a ni. Kan dik zawka aia upate an lo dik lo a nih pawhin tawngkam mawi zawkin kan dikna sawi chhuak thiam ila. Lehlamah chuan upa zawkte pawh hian nun dan mawi hre miah lova naupang zawkte tawngkam mawi lo taka lim erh ching hi an tam ve tho mai, tua te pawh hi kan inzir a ngai a, Zo nun ze mawi tak hi tunlai khawvel changkang kan tihah pawh hian a la hman theih zel a, engtikah mah a thing dawn lo tih kan hriat a tha. Hawihawmna nun hi motor khalhtute nunah hian lang chhuak mawlh teh se. Mi ramte phei chu driver leh driver an in hau hrep a, tawngkam chhe tinreng an hmang kan ti a ni mai thei; mahse, kei ni chu Mizo a lawm kan nih. A tha lo lam chu kan Mizo nun timawi lo khawpin kan seng lut tur a ni lo ve. Kan tana hlauhawm chu i ti lo ngam ang u: Lirthei khalh chunga mobile phone biak a tha lo va, a hlauhawm bawk a, nunna hial a chan theih tih kan hria a, traffic police hmuh lai chauha kan fimkhur kha a tawk lo, heti chung pawh hian lirthei khalhtu thenkhat chu traffic police ten an la hauh hriat tur an la awm nual a ni. Hauh nih lek phei chu a zahthlak hle a ni tih kan hriat a tha. A zahthlak hle kan tih lai hian thenkhat chu zak hmel awm pawhin an la lang lo. A pawimawh ber chu lirthei khalhlaia mobile phone biak loh tawp a ni mai. Chu chu a him ber a ni. Fing leh changkang kan intih viau lai hian fimkhurna tura kan fimkhur thiam leh si loh chuan kan la fing tawk lo va, kan la changkang tawk lo tihna a ni. Dan palzut chunga kan la hawipawr a, kan la thawveng viau a nih chuan zir tur kan la ngah hle a ni. Chuvangin, kan tana hlauhawm chu kan ti lo ngam mai tur a ni. Lirthei khalh loh laia biakna hun a la tam lutuk ringawt. Hmanraw changkang tak lo chhuak hi kan hman thiam tawk loh fo avangin accident a tam phah em em a ni. Hei hi keini ram chang a ni lo va, khawvel khawi hmunah pawh a ni vek a ni ti ila a sual awm lo ve. Mobile phone lo chhuah hnua dan siam chawp ngai tam tak a awm phah ta a ni. Fimkhur ila, kan zavaia tan himna kulhpui a ni ang. I inzirtir uar sauh sauh ang u. Inchhungkhurah pawh inzirtir mawlh mawlh ila, kan him tlang ngei ang.