ZALEN October 5, 2023 : Lirthei neitu leh driver pawl pangnga te chuan Vairengte leh Sairang inkar bakah Kawlkulh leh Hliappui inkar kawng chhe lutuk chu zawh tlakah an ngai tawh lo a, Chief Minister hnena an thu thlenin awmzia a neih loh avangin October 9, 2023 zing dar 7:00 atangin heng kawngpui te hi siamthat a nih hma chuan zawh tawh loh an tum.

Mizoram Truck Owner Association (MTOA), Mizoram Truck Drivers Association (MTDA), Mizoram Tipper Owner & Driver Association (MTA), Mizoram Oil Tanker Driver Association (MOTDA) leh Kolasib District Driver Welfare Joint Action Committee (KDDWJAC) te intelkhawmna Joint Asction Committee te chuan vawiin khan Aizawl Press Club-ah chanchinthat lakhawmtute an kawm a, heng tarlan tak kawng te hi a chhiat lutuk avangin zawh tlakah an ngai tawh lo tih an sawi.

Pawl panga inzawmkhawm te chuan Mizoram ei leh bar lakluhna hnukpui ber Vairengte-sairang inkar kawng chu motor lian rit phur zan zawh a hreawm hle an ti a, sawrkarin an siamthat mai an beisei avangin an zawh hram hram tih an sawi a, kawng hi a chhiat em avangin motor tlu pawh a tam tawh hle an ti. Driver thenkhat phei chu an tlan ngam tawh lo an ti.

Chief Minister pawh hemi sawipui tur hian hma an la a, appointment te pawh an dil a, an hlawhtlin mai loh avangin hun tiam siamin ziakin hma laksak rang tur leh hmalakna a awm loh chuan din mai an tum thu te an thlen a, mahse, hei hia awmzia a awm loh avangin 2.10.2023 khan pawl hruaitute te chuan a hmunah an enfiah a, hmalakna awm ve mah se, mamawh phuru khawp an hmuh loh avangin 4.10.2023-a Joint Committee chuan sawrkarin chak zawka a siam theih nan Thawhtanni, October 9, 2023 atangin heng kawng te hi zawh rih loh an titlu ta a ni.