Aizawl: Mipui hman chi lirthei (public transport) a thilziak chu khap reng a ni a, a tul angin an check fo thin niin Transport Department thawktute chuan an sawi. Tunhnaia sumo service pakhata thuziak ‘Mamit kawng chhe lutuk hi ka chau’ tih tarlan vanga DTO in an permit a hren chungchangah Zalen zawhna chhangin Transport thawktute chuan public transport a thildang lo ziah chu The Mizoram Motor Vehicle Rules 1996-in a khap tih an sawi a. Thil dang an ziak dawn anih chuan STA-ah phalna an lak a ngai nia sawiin maxi cab ah chuan an tlanna (service) tur hmun te chu ziah phal a ni a, a dang chu danin a khap niin an sawi a. Taxi ah pawh thildang an ziah dawn chuan STA ah an dil thin niin an sawi bawk. Transport thawktute chuan dan bawhchhia an awm leh awm loh chu an thlithlai ve reng nia sawiin, “Kan hmu vek seng lo a, kan hmuh chinah chuan hma kan la zel a. Lirthei neitute pawh hian dan phal loh chu ti lo mai turin kan ngen a ni,” an ti.