Aizawl: Aizawl khawpuiah lirtheia sun control vuah an tam leh tawh hle a, hemi chungchangah hian Zalen palai zawhna chhangin Aizawl Traffic SP chuan dan anga phal loh a la ni reng niin a sawi. Aizawl Traffic SP, C.Lalthanmawia chuan sun control chu vuah phal a ni lo tih sawiin Supreme dan angin a hnung leh a hma (front and rear) darthlalangah Visual Light Transmission chhutna hmanga 50% chu phal chin a ni a, a sir darthlalang (side glasses) ho ah hian 70% phal a ni ve thung niin Zalen palai a hrilh a. “Hei pawh hi motor siamtu company ten motor darthlalanga an vuah saah chauh phal a ni a, motor darthlalanga bel chawp chi hrim hrim hi danin a phal lo a, bel an awm a nih chuan dan bawhchhiatna a ni mai,” tiin Zalen palai a hrilh bawk. C.Lalthanmawia chuan sun control baka a ngaih pawimawh te Zalen hrilhin Supreme Court on Road Safety-ina thil pali a ngaih pawi-mawh em em - rui chunga motor khalh, tlan chak lutuk, phur rih lutuk leh lirthei khalh laia mobile phone hman te chu ti lo turin mipui te a chah a, hemi avang hian Aizawl District Transport Officer (DTO) hnuaiah driving licence tihtawpsak mi 12 an awm tawh thu a sawi a, hei bakah hian zan rei a chak tak taka bike khalh leh bike ri tihrin chu an ngaimawh thu a sawi bawk. Traffic SP chuan Aizawl khawpui chhunga traffic jam siamtu lian tak pakhat chu hma lam a thawl reng laia lirthei tlan muang lutuk te an ni tih sawiin hma lam a thawl chuan chak lutuk ni si lovin tlan chak deuh hlek turin motor khalhtute a chah a. Dan bawhchhia an awm leh traffic police mamawh an awm chuan Aizawl Traffic Police Helpline phone number (0389) 2322307/2313061 emaw mobile no. 09485302049-ah biak theih a nih thu Traffic SP chuan Zalen a hrilh bawk.