Zaithiam lar Elvis Presley-a fanu neih chhun January 12-a boral Lisa Marie Presley chu January 22, 2023 (Pathianni) khian Graceland, Tennessee-ah vui liam a ni dawn. Graceland mansion-ah hian a pa Elvis Presley leh a fapa boral tawh Benjamin Keough te chu phum an lo ni tawh a, he lai hmunah hian Marie ruang hi an zalh ve dawn a ni. 

Kum 54 mi Lisa Marie Presley hi Ningani khan cardiac arrest avangin a chenna inah a boral a, uitu a ngah hle. A thih thu hian khawvel a deng chhuak nghal a, amah thlahna thu social media lamah hmuh tur a tam hle. Lisa Marie Presley hi 'King of Rock 'n' Roll' an tih mai Elvis Presley-a a fanu neih chhun a ni a, hei vang hian uitu pawh a ngah zual niin a lang. 

Elvis Presley hi kum 1977 khan kum 42 mi chauh niin a thi a, Lisa Marie Presley hi a fa neih chhun a ni. Lisa Marie Presley hian fa pali a nei thung a, chung zinga mi Benjamin Keough chu August 2020 khan amah a intihlum a, kum 27 mi chauh a ni. A pa leh a fapa te hi an mahni estate Graceland, Tennessee-ah hian phum an ni ve ve a, he lai hmunah hian Lisa Marie Presley pawh hi an zalh ve leh dawn a ni. 

Lisa Marie Presley hian pasal pali - Danny Keough, Michael Jackson, Nicolas Cage leh Michael Lockwood te a nei hman a, fa pawh pali a nei. A pasal hnuhnung ber Michael Lockwood nen hian 2006 khan an innei a, 2016 khan an inthen ve leh - a thih hian pasal pawm lai a nei lo. 
Graceland estate hi 17,500 square feet zeta zau a ni a, White House bul maia awm niin, United State-ah chuan in tlawhtu ngah ber a ni hial. 

Lisa Marie Presley pawh hian a thih hma khan a pa Elvis Presley piancham January 8 pualin Graceland hi a tlawh nghe nghe a ni.