Premier League champion leh FA cup champion-in England football season tan hmain FA Community Shield an inchuh thin. Nizan khan Leicester City home ground King Power Stadium-ah FA Cup champion Liverpool leh Premier League champion Manchester City an inkhel a, 3-1 in Liverpool an chak. 

Team hnihte an inhnehtawk a, ball possession-ah City an sang hret a, 58% changin passing pawh tum 537 zet an inpe kual a, 84% pass accuracy an nei. Reds lam hi tum 396 an in pass thung a, an pass accuracy hi 81% a ni. Liverpool-i'n goal shot ngah zawkin 15 an shot a, target erawh tum 4 chiah a fuh thung. City lamin 14 shot neiin target-ah vawi 8 an fuh thung. 

Pre-season friendly khel zo hlim an ni a, an zin kualnaah an chetha ve ve bawk. Community Shield erawh a danglam deuh a, Shield inchuh an ni a, team hnihte chak ngei tumin an that theih dan berin an inrem. 

Inkhelh tan atanga minute 21 naah Liverpool tan Trent Alexander-Arnold-a'n goal a khung a, first-half ah goal dang a luh belh lo. Second-half tan a ni a, inkhelh a danglam tehchiam lo. Minute 70-naah City tan an striker thar Julian Alvarez chuan an siphurh sutna goal a khung. Minute 13 a ral tihin Mohamed Salah chuan penalty atangin Reds goal hnihna a khung. Inkhelh inhnehtawk takah goal a luh belh tawh dawn lo emaw tih laiin bench atang rawn lut, player thar Darwin Nunez chuan added time-ah Liverpool goal thumna leh chak nemnghehna goal a rawn khung.