Tun season hian Liverpool club chu treble champion ni thei dinhmunah an ding mek a, chumi kawnga player thawhhlawk ber pakhat chu Mohamed Salah hi a tih loh theih loh. Egyptian hian a team te chakpui turin vawi tam player tha bik a nih zia a lantir tawh thin a, hun khirh an hmachhawn tumin an player pawimawh bik a nih zia a lan tir fo tawh bawk. 

Liverpool winger contract hi nakum hian a tawp mai tawh dawn a, mahse a contract pawhsei chungchangah thu thar a awm rih lo. Club a chhuahsan mai ring pawl an awm laiin a thawh hlawk dan ngaihtuaha a chhuah mai loh ring pawl an awm bawk. Liverpool lamin Salah an chelh rih chhan tur 3 hi han thlir chhin la, chelh chhan tlingah i ngai em?

#1 Season tina goal 15 chuang a thun ziah
Liverpool hian an chanchinah goal thuntu ropui tak tak Michael Owen, Robbie Fowler, Fernando Torres leh Luis Suarez te an lo nei tawh thin. Mahse, heng ho zingah hian kum 5 chhunga Salah goal thun theih anga ke hmui an awm ve tlat lo. 

Egyptian hian Premier League game thum chhung zet chu goal a thun ta lova, chutichung chuan tun season-ah ringawt goal 20 thun tawhin assist 11 a nei tawh. Tin, season 5 chhung zet chu Salah hian league-ah goal 15 a thun tling ngei ngei a, hetiang record ropui nei thei hi tuna Premier League player zingah an awm lo. 

#2 Mohamed Salah hi ala fit tawk
Salah hian kumin hian kum 30 a tling ve dawn ta a, mahse amah hi ala zuai lo tih a hriata, mual chhunga a che velah a fitness hi a la pangai em em tih a hriat bawk. A fitness thlir tel miah lovin a kum tam tawh vang ringawt chuan Liverpool hian an chhuah ngawt a rinawm loh. 

Kum 5 chhung league a khelh tawhah khan game khelh theih 183 zingah Salah hian game 174 zet a khel a, heng tournament a khelhna te hi competition pawimawh ber ber te an ni bawk. A kum a upa ve tan tih mual chhungah a la hriat rih loh.

#3 Mohamed Salah hi big-game player a ni
Jurgen Klopp-a hnuaia Liverpool hlawhtlinna lian tak pakhat chu hun pawimawh 'big game' an tih maia an chetha thin hi a ni awm e. Premier League a team lian zual paruk an hmachhawn dan leh Europe club lian dang laka an chet dante, an chak theih em avangin trophy pawh an hlawh chhuak fo reng a ni. 

Heng game pawimawh tak taka an chak chhanah hian Salah hi hmun pawimawh luahtu a ni a, game pawimawhah goal a khung thei em em. Kum 29 mi Salah hian kum 5 chhungin Premier League-a big six an tih mai club tha paruk te nena game 47 an khelhah goal 35 zet a thun thei a, hei mai nilovin 2019 Champions League final-a Tottenham Hotspur nen an inhmachhawn tum khan goal pawimawh a thun bawk.