Mohamed Salah chu kum 2021-2022 chhunga Liverpool mipa player tha ber 'Player of the Season' a tan thlan a ni. Egyptian thlang chhuaktute hi club supporter te, Forever Reds bakah club official player association hlui te an ni.

Season liam ta chhung khan Salah hian competition hrang hrangah goal 31 thunin assist 15 zet a nei bawk a, 'Player of the Season' dinhmun luah tur hian an goalkeeper tha Alisson Becker a nek chhuak a ni. 

Liverpool tana thawhhlawk tak Salah hian, season liam ta Premier League Golden Boot leh Playmaker award te lo dawng tawhin Football Writers' Association Footballer of the Year leh PFA Fans' Player of the Year chawimawina a lo dawng tawh bawk a, tun tuma a chawimawina dawn hi number 11 tan hian kumin chhunga a mimal chawimawina dawn hnuhnung ber tur a nih tawh hmel.  

Premier League-ah goal 23 thun ve dang Tottenham Hotspur player Son Heung-min nen Salah hian Golden Boot an indawn tawm a, tin a teammate Trent Alexander-Arnold aiin assist pakhatin a ngah zawk bawk. Salah hian season khat-a goal 30 chuang thun hi Anfield-a a khelh chhungin tum thum a nei tawh a, Liverpool club history-ah hetianga goal thun thei player palina chiah a ni bawk.

Liverpool player zinga goal thun tam list-ah pakuanna ni phak bawkin match 254 a khelh tawhah goal 156 zet a thun tawh. Season liam ta khan  Jürgen Klopp-a pawl te hian Premier League leh Champions League-ah te champion chiah lo mah se Carabao Cup leh Emirates FA Cup te erawh an chawi thei tho.