Liverpool hian 2022-23 Premier League season bul tannaah harsatna an tawk nual a. English top flight-ah an game hmasa 11-ah vawi li chiah hnehna an chang thei. Buaina an tawh mek sukiang turin an player thenkhat hi an luh loh tir ngam a ngai niin a hriat.

Merseysiders hian league table-ah hmahruaitu Arsenal chu point 12-in an phak lo a, tun season-ah tun thlengin an player pawimawh mi eng emaw zatin beisei an phak lo va, an khel ṭha rih lo hle a ni. Manager Jurgen Klopp-a pawhin a player ṭhenkhat hi chu regular taka khelh an phu tawh lo tih a hriat a ngai a, squad thar a din a ngai tawh takzetin a hriat. 

Reds starting lineup-a tel tlak tawh lo a ngaih player pathum te chu:

1. Jordan Henderson

Tun hnaiah Liverpool hlawhtlinna kawngah Jordan Henderson hian hmun pawimawh tak a chang a, a khel enin a chetha thawkhat. Englishman hian tun thlengin Reds tan game 462 (inelna zawng zawngah) a khel tawh a, goal 33 a khung tawh bakah assist vawi 58 a nei tawh bawk. Kum 2011-12 khan 'Liverpool Young Player of the Season'-ah thlan a nih bakah 2019-20 khan 'PFA Team of the Season'-ah pawh a hming a la phak hial. 

Amaherawhchu tun hnaiah Henderson hi hliam vangin a buai a, hei vang hian a taksaah harsatna hrang hrang a tawk bakah a tlakhniam ve phah hle niin a hriat. Midfielder hi a hun hmasa lam angin a tuan a tha tawh lo va, a tlan chak tawk loh vangin a dinhmun a ṭhat loh phah fo bawk. Henderson hian tun season-ah goal a la thun lo va, Premier League-a a tackles zaa 56 chauh a la thei bawk.

Reds hian table sang zawk luah an duh a nih chuan an starting line-up atangin an captain hi an chawlh tir ngam a ngai niin a lang. 

2. James Milner

Tun thlenga Reds tana James Milner a la inlan fo hi thil mak a tling tawh. Mibik Ronaldo kan sawi thin a, English midfielder pawh hian kumin hian kum 37 a tling ve der tawh a, a vanglai a pel tawh a ni. Tun season-ah Reds tan Premier League game 10-ah inlanin goal khat bak a la siamsak lo.

Milner hian top-level football khel tam hle mahse a thiamna leh theihna a sang tawh lo tih a lantir nasa hle a, inkhelhna reng rengah a pawlte tan a thawhhlawk tawh loh zia 'WhoScored' ten a record an tarlan atang hian a fiah awm e. Milner hian tun term chhungin Premier League-ah key pass 0.9 chiah neiin tackles 0.9 chauh a nei bawk a, interception vawi 90-ah 0.6 a nei tling hram bawk.

Transfer window inhawn leh hmasa berah Englishman thlakna tur hi Klopp hian a ngaihtuah vat a ngai a ni. A nih loh chuan amah zawk hi thlak a ngai mai ang tih a hlauhawm.  

3. Fabinho

Tun season-ah Fabinho hi a tlahniam hle a, team pawhin an buai phah nasa tih a hriat. Brazil international hi season hmasa thleng khan Europe-a defensive midfielder ṭha ber pawl a ni a, mahse tun season-ah erawh kum dang a phak lo hle a ni. 

Midfielder hian thahnemngai takin midfield thunun tum thin mah se a thei rih thlawt lo va, amah a talbuai phah fo zawk niin a lang. Tun season chhung hian league-ah key pass 0.3 chauh a nei a, clearance 0.9 leh interception 0.8 chiah a nei bawk.

Tun dinhmunah chuan Reds hian an player thenkhat hi thlak danglam ngam se, khelmual sir lama thawhhlawk tur zawk player dap bawk se, an dinhmun an chawikang leh theiin a rinawm.